CCE: cartae cluniacenses electronicae
Database of the Charters of the abbey of Cluny (802-1300)

BB 3518     View  [Back]
Charta qua Hugo, Burgundionum dux, dat monasterio Cluniacensi ecclesiam Sanctæ Mariæ in castro Avalonensi.
Postquam omnipotentis et æterni Patris unigenitus Filius, eidem Patri Sanctoque Spiritui coęternus et consubstancialis, humanum genus diabolica fraude deceptum, ac ignorantię tenebris miserabiliter obvolutum, per misterium sue sanctę incarnationis ac salutifere passionis a diabolica dominatione interventu sue mortis redemit, quo scilicet, remota legis umbra, Sancti Euvangelii claritas cunctis per orbem fidelibus per apostolicam predicationem innotesceret, multi potentum ac divitum hujus seculi, divina edocti predicationę, facultates a Domino sibi conlatas, in meliores usus transtulere, exheredantes se in hoc seculo, ut superni regni efficerentur heredes, imitantes scilicet illam Domini vocem que in Euvangelio clamat: «Facite vobis amicos de Mammona iniquitatis, ut cum defeceritis recipiant vos in ęterna tabernacula»; et alias: «Date helemosinam et ecce omnia munda sunt vobis.» Nec minus consona his veteris etiam instrumenti nobis hystoria pandit, ubi scilicet et Danihel propheta sanctus regem Caldeorum legitur commonuisse, ut helemosinis redimat peccata sua; et alio in loco voce sapientis viri dicitur: «Redemptio animę viri divitię ejus.» His atque hujusmodi legis divinę informatus exemplis, ego Hugo, Dei gratia Burgundionum dux, dono et concedo omnipotenti Deo ac beatissimis apostolis ejus Petro et Paulo, ad Cluniacense monasterium, ubi domnus Hugo abba preesse pariter ac prodesse videtur, ecclesiam Sanctę Dei genitricis Marię, que sita est in castro Avalonensi, que videlicet ab antecessoribus meis ducibus antiquitus hereditario jure posses[s]a est, cum omnibus rebus ad ipsam ęcclesiam pertinentibus, sanctorum scilicet reliquiis ac reliquis æcclesiasticis ornamentis, que singillatim inferius annotata habentur. Dono etiam et concedo quicquid ex meo dominicatu in exteriori substancia ad ipsam ecclesiam pertinere dinoscitur, in terris scilicet, possessionibus ac prediis, cultis et incultis, silvis et planis, pascuis ac decimis, et preter hæc omnia ex meo jure unam condaminam, que sufficiat ad excercium unius carrucę; ipsam quoque carrucam instauratam et integram similiter do. Concedo insuper ac relinquo eidem ecclesię censum de censualibus terris ad eandem ecclesiam pertinentibus, et quas milites mei ex mea obtinent largicione, ut deinceps idem census Deo illic servientibus ad corporale stipendium proficiat. Canonici sane numero VIIII in sepedicta ecclesia actenus proprias habuere prebendas, e quibus unus jam vita decessit, alii duo suas prebendas sponte reddiderunt; de reliquis vero qui supersunt, communi consilio definitum est, ut si videlicet in vita sua ipsas prebendas relinquere noluerint, eo tenore quamdiu vixerint eas possideant, ut, cum ab hac luce migraverint, nullus eis alius succedat, set solummodo Cluniacensis æcclesia eas perpetuo possideat. Hæc est autem descriptio ornamenti ipsius æcclesię: cappę XII; casule VIIII; albe XI et una ex auro texta; amicti X aurei et II viliores; cinctoria VI; stole aureę VIII; manipuli VII et tres aurei; dalmatice III; tunicę IIII et una cum auro; vexilla IIII; pallia IIII aurea et XX sine auro; cortine palleę VIIII; fascitergia X et unum cum auro; dorsalia II; tapetia IIII; tersoria IIIa; bancales III; cortinę linee VI, laneę II; tabula I argentea; cruces aureę II et argenteę II; turibulum unum argenteum; calices argentei III et unus aureus; patene argentee III et una aurea; textus unus aureus et unus argenteus aliusque dimidius; capse argentee V, et una aurea; urceolum mare vitreum I; corona argentea I; baculum sancti Lupi; scrinia eburnea II; tabula eburnea I; bustulę eburneę II; filacteria aurea XXII, argentea XIIII et III de auricalco, cum una capsula; bustulę eburneę VIIII; scripuli tres; calamus unus argenteus; imago sanctę Marię cum aurea corona et armillis aureis; imago sancti Lazari aurea; missalia III; libri simul omnes CXV. Hanc ergo ecclesiam, cum consilio pariter atque consensu optimatum meorum parentumque et omnium amicorum, cum omnibus suis ornamentis, possessionibus vel appendiciis, sicut suprataxatum est, ad integrum trado omnipotenti Deo et sanctis apostolis ejus Petro et Paulo, pro redemptionę anime meę seu antecessorum meorum, ut pius ac misericors Deus peccata et negligencias meas sua ineffabili clementia remittere dignetur. Facta est autem hæc donatio in castro Avalonensi, XI kalendas martii, presente donno Oddone, Cluniacensium priore, a quo etiam omnes qui hujus doni laudatores extiterunt in fratrum societate admissi sunt, ut s[c]ilicet in orationibus et elemosinis vel etiam ceteris jam dicti loci benefactis amodo participes existant. Si quis vero, (quod absit!) in posterum contra hujus sanctionem decreti ausu temerario manum improbe contradictionis imferre temptaverit, et hanc nostrę devotionis helemosinam alicujus calumpnię nevo nisus fuerit obfuscare, iram Dei omnipotentis et sanctorum ejus offensam incurrat, nisi cito congrua satisfactionę penituerit. Signum Hugonis ducis, qui hoc donum fecit. S. Oddonis, fratris ejus, qui hoc jurisjurandi sacramento firmavit. S. Rotberti, alterius fratris ejus, clerici. S. Wuidonis, comitis Matiscensis. S. Bernardi de Montfort. S. Heustachii, filii ejus. S. Artaldi de Avalone. S. Girardi de Fonte Vivent. S. Warulfi. S. Rainerii, pincernę ducis. S. Stephani de Noveris. S. Milonis et Jarentonis germanorum. S. Hugonis presbiteri. S. Hugonis prepositi. S. Yvonis et Rotberti, nepotum ejus. S. Aymonis de Divione. S. Oddonis. S. Willelmi. S. Josmari. S. Otberti de la Rocha. Facta est autem hec carta anno ab incarnatione Domini millesimo LXXVIII, indictione I, tempore Phylippi regis.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung