In nomine sanctę et individuę Trinitatis. Ego Wilelmus, Pictavensis comes ac totius dux Aquitanię, peccatorum meorum memor, ut Deus fieri dignetur inmemor, consilium accipiens a legatis apostolicis venerandę sanctitatis viris Amato, episcopo Olorensium, Hugone Diensium, licentia et auctoritate ipsorum, ęcclesiam beati martiris Eutropii corpore insignem, postquam de manu laicali eripui, et ei libertatem Deo donante adquisivi, consensum etiam constituendi in ea ordinis monastici non solum a predictis vicariis, sed etiam ab episcopo Sanctonensi et canonicis obtinui, transscribo et transfundo legitima transscriptione de manu mea in manum beati Petri Cluniacensis monasterii, cujus abbatem domnum videlicet Hugonem presentem video, ut locus iste ad servitium Dei ordinandus per eum ejusque successores omnibus deinceps temporibus disponatur et preter censum V solidorum cum reverentia matrici ęcclesię debita, nulli hominum quicquam debeat. Rogo vero, patres reverendi, qui vineę ęcclesiasticę cultores vice beati Petri advenistis, ut donum hoc confirmetis et corroboretis sicut oportere scitis, sigillo vestrę, id est apostolicę auctoritatis et perpetualiter ratum censeatis. Confirmo ego A. Olorensis episcopus sanctę Romanę sedis vicarius, et omni auctoritate corroboro. Ego quoque H. Diensis presul, ejusdem legationis sotius, id conlaudandum censeo. Quęcumque autem persona hanc tanta auctoritate subnixam presumpserit quocumque diabolico ausu infringere, noverit anathematis se gladio transfigant. Abbas Lemovicensis interfuit Ademarus; abba Angeriacensis Odo presens fuit; fuerunt et presentes abba Casę Dei Seguinus, abba Sancti Cipriani Rainaldus. Personę laicales istę sunt quę viderunt et laudaverunt: domnus Calo vicecomes, Rotbertus Burgundus, Wilelmus Bastardus, Dommellus vel Senioretus prepositus. Nec defuere fratres conscriptione digni de ordine monastico: domnus Teuzo, de palatio domni pape, domnus Wido, monachus de Casa Dei, frater comitis Nevernensis; Clunienses: domnus Falco, de Galliniaco olim dictus, domnus quoque Gerento, et domnus Pontius et multi alii. Quę donatio consummata sive completa est in camera quadam Sancti Eutropii a manu comitis in manum domni abbatis Cluniensis Hugonis, anno incarnationis Dominicę MLXXXI, indictione IIII, mense januario III idus, regnante Philippo apud Francos, apud Teutonicos et Italos Heinrico, apud Romanos presidente matri ęcclesiarum VII Gregorio, sub Aquitanorum comite Gaufredo Wilelmo, anno et ebdomada qua Synodus Sanctonensis est celebrata, super omnes reges imperante indeficienti vigore Domino nostro Jesu Christo cum Patre et Spiritu Sancto ęquali et consubstantiali potentia per infinita secula seculorum. Amen.