Charta qua Engelelmus, præpositus Humberti de Borbonio, dat monasterio Cluniacensi terram in villa Varengis.
In nomine omnipotentis Dei. Ego Engelelmus, prepositus domini Humberti de Burbonio, relinquo omnipotenti Deo et sanctis apostolis
ejus Petro et Paulo et Cluniacensi monasterio, quam habebam quandam terram in villa que dicitur Varengis, que fuit de capite Jarlendis, uxoris mee, dono, concedo et laudo sine ulla calumpnia vel alicujus contradictione, pro salute anime mee ac remissione omnium delictorum meorum, ipsa conjuge mea laudante et filiis meis, Walterio, Bernardo clerico, Constantio et filia Maria. Accepi preterea pro hoc dono Vque solidos a domno Fulcherio, Lurdonensi decano. S. Hugonis Burzini, qui hujus doni fidejussor fuit. S. Gisleberti, Lurdunensis prepositi. S. Ingelfredi. S. Bernardi, qui hujus terre custos et cultor esse videtur.