Anno ab incarnacione Domini nostri Jesu Christi milesimo nonagesimo tercio, duodecimo die mensis julii, indictione prima, monasterio Sancti Petri scito in loco qui dicitur Clugneto. Nos, in Dei nomine, Auprandus et Albertus, germani filii quondam Johannis de loco Muzo, qui professi sumus ex nacione nostra legi vivere Longobardorum, offertores et donatores ipsius monasterii, presens presentibus diximus: Quisquis in sanctis ac venerabilibus locis ex suis aliquid contulerit rebus, juxta Auctoris vocem, in hoc seculo centuplum accipiet et insuper, quod melius est, vitam possidebit eternam. Ideoque nos qui supra Auprandus et Albertus, germani, donamus, offerimus a presenti die in eodem monasterio pro animarum nostrarum mercede, id est nostram portionem de capella una, que est edificata in castrum de loco Clizano, et est consecrata in honore sanctorum Gervasii et Protasii, et omnes casas et res territorias atque decimas ad ipsam nostram porcionem de predicta capella pertinentes in juris nostri, quas habere visi sumus in isto loco et fundo Clizano. Quam autem istam nostram portionem de predicta capella et omnes casas et res territorias atque decimas ad predictam nostram portionem de predicta capella pertinentes juris nostri supradicti, una cum accessionibus et ingressibus, seu cum superioribus, qualiter supra ab hac die in eodem monasterio Sancti Petri donamus, cedimus, conferimus, et per presentem cartam offersionis ibidem habendum confirmamus, faciendum exinde a presenti die pars ipsius monasterii de juris proprietarii nomine quidquid voluerint, sine omni nostra et heredum nostrorum contradictione. Quidem expondemus atque promittimus nosque germani, una cum nostris heredibus, parti ipsius monasterii, aut cui pars monasterii dederit istam offersionem, qualiter supra, in omni tempore ab omni homine defensare; quod si defendere non potuerimus, aut si parti ipsius monasterii exinde aliquid per quodvis ingenium subtrahere quesierimus, tunc in duplum eandem offersionem parti ipsius monasterii aut cui pars ipsius monasterii dederit restituamus, sicut pro tempore fuerit meliorata aut valuerit sub extimacione in consimilibus locis. Actum in loco Isex feliciter. Signum manuum istorum Auprandi et Alberti, qui hanc cartam offersionis fieri rogaverunt ut supra. Signum manuum Loterii et Alberti atque Gosfredi seu Alberti testes. Ego Petrus, notarius et judex sacri palatii, post tradita complevi et dedi.