In nomine sanctę et individuę Trinitatis, Patris et Filii et Spiritus Sancti. Noverint omnes sanctę Dei ęcclesię filii, presentes scilicet et futuri, quod ego Hugo, Dei gratia Lugdunensis archiepiscopus, dono Deo et sancto Petro et reverentissimo in Christo patri nostri donno Hugoni, Cluniacensis ęcclesię abbati, et successoribus ejus fratribusque sub eorum ducatu Deo militantibus, æcclesiam Sancti Desiderii sitam in Brixia, sub annuali censu trium solidorum, retentis paratis et sinodo, secundum antiquum morem aliarum ęcclesiarum episcopatus nostri; et capellam de Reorterio, cum ęcclesia Sancti Pauli infra castri ipsius munitionem sita, cum appenditiis ejus, sub annuali censu quinque solidorum, cujus medietas solvetur in festivitate sancti Martini, medietas vero in Purificatione sanctę Marie. Hęc itaque, salva subjectione sanctę Lugdunensis ęcclesię, do ęcclesię Cluniacensi, per manum dilectissimi in Christo fratris nostri Seguini, ipsius donni abbatis camerarii, jure perpetuo possidenda, pro remedio animę meę et ut fratres ęcclesię Cluniacensis Deum deprecentur pro excessibus meis et pro statu ęcclesię Lugdunensis, necnon et pro salute omnium canonicorum et consanguineorum nostrorum. Facta est autem donatio hęc Lugduni, in presentia Gerini, capellani nostri, et Hugonis, nepotis nostri, et Godonis, archipresbiteri, canonicorum, et Gyrardi archipresbiteri. Ut autem hęc donatio firma permaneat, sigillo proprio subterfirmavi. Actum Lugduni, anno ab incarnatione Domini nostri Jesu Christi millesimo nonagesimo quarto, indictione secunda, concurrente VI. Ego Hugo, Divionensis ęcclesię monachus, vice cancellarii scripsi et subscripsi.