In nomine Patris et Filii et Spiritus sancti. Domno Hugoni, sanctæ Cluniacensis ęcclesię abbati, Clementia, Flandrensium comitissa, beatam cum dextræ partis ovibus portionem. Quoniam de pietatis vestræ visceribus, pater reverende, plurimum presumo, idcirco pro religione in partibus nostris per vos constituenda, nunc scriptis, nunc internuntiis fiducialiter ad misericordiam vestram recurro. Nullum enim opus gratius creatori nostro fore existimo, quam ut his operam demus, quatenus locus qui huc usque plane erat ęcclesia malignantium ex superni respectus inmutatione fiat gloriosa habitatio Deo servientium et regulariter ac pie insimul viventium; et quoniam sancta prudentia vestra michi scripsit, ut juxta cujusdam sapientis dictum, plus rerum exitus quam initium attenderem, vosque discordias procerum ac ipsius loci fratrum vereri, ad id primum audacter respondeo, quod in hoc meo proposito omnino firma, immo constantissima, Deo teste, perseverabo, nec pro dissensione procerum, que nulla erit, cum maxime cordi sit omnibus, nec pro controversiis seu contradictionibus fratrum, quos omnimodis ad nichilum redigemus, a tam sancto opere tamque pia intentione quoad vixero umquam declinabo. Ego igitur, Clementia, gratia Dei Flandrensis comitissa, eadem potestate ac stabilitate quo dominus meus, dum adhuc in terra sua esset, quecumque juris mei sunt ordinans, atque disponens, consilio episcoporum meorum, Johannis videlicet Morinensis, et Lanberti, Atrebatensis, simulque instinctu quorumdam principum, quos ad hoc mecum disponendum altiori quidem consilio convocavi, juxta petitionem ipsius abbatis atque voluntatem celitus michi inspiratam, monasterium beati Bertini omniaque ad ipsum pertinentia, tam exterius quam interius, et quicquid ad nos ac antecessores nostros ex eodem actenus attinebat, Deo et sancto Petro, vobis quoque ac successoribus vestris per concessionem diocesani episcopi libenter concedimus, et per presentis paginæ traditionem, jure perpetuo donamus atque pro redemptione animæ meæ ac successorum meorum, pro salute quoque domini mei Rodberti comitis, de cujus voluntate atque assensu super hoc negotio, si forte divina pietas eum reduxerit, certissima sum, locum illum secundum tenorem litterarum domni papæ perfecte vobis subicimus, ita etiam ut abbas a vobis ibidem ordinatus, si secundum regulam beati Benedicti et sacras institutiones vestræ Cluniacensis æcclesiæ non vixerit, liberam facultatem eum removendi alterumque substituendi habeatis, presertim cum non aliunde, nisi de Cluniaco, quemquam deinceps ibidem liceat preesse. Hæc autem omnia concessa et firmiter collaudata sunt sub testimonio episcoporum supra memoratorum: Johannis, Tarvanensis, et Lanberti, Atrebatensis, ac obtimatum meorum, scilicet: Rodberti de Betunia, ipsius abbatiæ advocati, atque Balduini, ejusdem villæ castellani, necnon Baldrici, magnę probitatis viri. Ad vestram ergo magnam prudentiam atque sanctitatem spectat locum illum pro amore Dei ex vestris religiosis personis ac honestis viris, quibus habundatis, sic ordinare, quatenus malitia inibi diutius jam molita penitus extirpetur atque in vita morumque honestate ibidem conversantium nomen Domini per omnia ab omnibus glorificetur. Amen.