CCE: cartae cluniacenses electronicae
Database of the Charters of the abbey of Cluny (802-1300)

BB 3736     View  [Back]
Charta qua Albertus, filius Huberti de Bonadico dat monasterio Cluniacensi et Sancto Gabrieli Cremonensi ecclesiam Sancti Stephani in episcopatu Veronensi.
In nomine Domini Dei ęterni, anno ab incarnatione Domini nostri Jesu Christi milleximo centesimo, secundo die introeunte mense junio, indictione prima. Ego Albertus, filius quondam Huberti de loco Bonadico, qui professus sum lege vivere Romana, libenti animo et mea bona spontanea voluntate, una cum filio meo Henrico, dono atque offero, pro mercede animę meę et parentum meorum ęcclesiam Sancti Stephani, sitam in episcopatu Veronensi, in territorio Bonadico, cum omnibus rebus ad eandem ecclesiam pertinentibus, scilicet terra culta et inculta, silvis, pratis, pascuis, et vineis, ac paludibus, saletis, sacionibus, Sancto Petro de Cluniaco et Sancto Gabriheli de Cremona, ita ut sit in dispositione prioris Sancti Gabrihelis de Cremona, scilicet ut mittat priorem et monachos quos voluerit, et Sanctus Petrus Cluniacensis inde habeat uno quoque anno decem solidos Veronenses monete per manum prioris Sancti Gabrihelis; eo videlicet ordine atque tenore, ut non liceat alienare eandem ecclesiam sine consensu ejusdem Alberti et heredum ejus, et isdem Albertus sit ejusdem ęcclesię adjutor atque defensor, nullo alio jure sibi retento. Si quis vero, quod futurum esse non credo, si ego Albertus suprascriptus (quod absit!) aut ullus de heredibus ac proheredibus meis, seu quelibet ulla opposita persona, contra hanc meam cartam offersionis ire quandoque temptaverit, aut eam infringere quesierit, tunc a liminibus ęcclesiarum extranei efficiantur, et cum Dathan et Abiron, et cum Juda traditore, cui Dominus intinctum panem porrexerit, ante tribunal ęterni exinde habeat racionem in die judicii, et insuper componat a parte predicte ecclesie Sancti Petri et Sancti Gabrihelis duplas ipsas res, sicut pro tempore fuerit meliorata, aut valuerit sub estimacione in consimilibus locis, et nec mihi liceat ullo tempore nolle quod volui, sed quod a me semel factum vel conscriptum est inviolabiliter observare promitto, cum stipulacione subnixa. Actum in loco Sancti Stephani feliciter. Signum manuum suprascriptus Albertus et filius ejus, qui hanc cartam offersionis scribi rogavit ad suprascripta omnia. Signum manuum Guariento de Monte Aureo, Albricus de Orte, Paganus de Lazese, Guazo de Menervi, Natale Hubertus, Martinus de Bonadico, in hac carta rogati testes. Ego Johannes notarius rogatus hanc cartam offersionis scripsi et post tradita complevi.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung