CCE: cartae cluniacenses electronicae
Database of the Charters of the abbey of Cluny (802-1300)

BB 3742     View  [Back]
Charta qua Hugo, abbas Cluniacensis, dat monialibus Marciniacensibus obedientiam de Igaranda, pro quibusdam obedientiis et aliis rebus camerario Cluniacensi invicem concessis.
Noverint omnes fratres nostri, presentes et futuri, quod ego Hugo abbas, diu tractantibus meque instanter deprecantibus filiis ac fratribus nostris, domno videlicet Heinrico priore, domno Bernardo camerario, Hugone cellarario, Ilio decano, Artaldo decano de Lordono, pluribusque aliis, concedo perenniterque dono obędientiam de Igaranda cum appendiciis suis, satis scilicet defraudatam et attenuatam, Marciniacensi loco sororibusque nostris ibi die ac nocte servientibus Deo, quarum procurationem commisimus filio nostro domno Seguino. Visum est namque nobis et dicitur a multis, quod postquam hęc obędientia Marciniaco pertinuerit, quia prope sita est, frater illius loci eam studiose colendo, sepius videndo, plura ibidem adquirendo, poterit ipsam edificare et ad utilitatem sororum illarum meliorare. Pro cujus commutacione, laudantibus similiter et poscentibus fratribus nostris, damus quędam de his quę Marciniaco appendebant, camerę Cluniacensi, quasdam videlicet obędientias, villas, mansos, reditus atque pecunias, quorum nomina hic habentur posita. Primitus vero ponitur inter cętera tota obędientia de Berziaco villa, cum omnibus ibidem pertinentibus; terra Faletrudis, quę nominatur similiter de Berziaco villa, in qua jam dictus Seguinus donavit quatuor milia solidos et ducentos viginti et unum palefredum; obędientia de Furchas, solvens annuatim decem solidos Morlanenses; in obędientia de Cavaros viginti sextarii fabarum; in obędientia de Amberta viginti solidi Lugdunensis monetę; mansus de Monte Canino, reddens septem solidos ejusdem monetę, vel parcerencus fiet ibidem, si magis placuerit camerario; mansus de la Charala, de quo solvuntur quindecim solidi ejusdem monetę vel parcerencus; in villa de Bruales et in villa de Salas, quicquid Marciniacus ibi habebat, vineę scilicet et castanaria, ubi octo quarratę vini recipi solent, si non coquatur aut tempestetur; in villa de Ronnens septem solidi ejusdem monetę et quinque asinate sigili; in villa de Aquispassis, septem solidi ejusdem monetę; obędientia de Telerias reddens quindecim summatas salis debitales; in villa de Salins una caldaria solvens annuatim quinquaginta solidos; mansus de Rocha reddens medietatem vini unius vineę et unum prandium; mansus de Vilars Manols, solvens similiter medietatem vini unius vineę et unum prandium et taschiam ipsius terrę et duos solidos in festivitate sancti Martini; mansus de Marriaco reddens duos panes et duodecim nummos, et unus campus appendens huic manso, reddens taschiam; terra Bosroen, quam dedit Marciniaco Fulcrens pro filia sua; mansus de Vallis quem dedit Hugo Ferruls; obędientia de Saltu, et omnia quę ibi pertinent; in villa de Cavaniaco unus mansus; in villa de Catgiset unus clausus, quem dedit Marciniaco Ada, soror domni Hugonis cellararii, excepto uno modio vini quem ipsa dedit monachis de Quadrella; in valle de Matciaco quicquid Regina de Obled dedit Marciniaco post mortem filii sui. Sub hac etiam convenientia concessit domnus abbas camerario, ut per manum ipsius in predicto loco Marciniensi domina una reciperetur, nichil ibi tribuens, nisi quod juxta morem aliarum dominarum honeste esset induta; quicquid autem ipsa dedisset sive terram, sive pecuniam, camerarius in proprio haberet. Hoc tantum in obędientia de Berziaco retentum fuisse omnes noverint, quod ex ipsa in anniversario patris nostri domni Hugonis abbatis plena refectio Cluniensi conventui in perpetuum amministrabitur, et in anniversario domni Petri de Gletens, tantum generalis eidem conventui de ea preparabitur. In obędięntia etiam de Ygaranda, hoc solum retineri cunctis ignotescat, quod frater ille qui Marciniaci curam gesserit, ex ea in anniversario domni Dalmatii de Sinemuro, patris videlicet domni Hugonis abbatis, generalem tantummodo Cluniensibus fratribus perpetuo solverit. Facta est hęc commutatio, sicut hic scripta habetur, anno ab incarnatione Domini M. C., sedente in Romana ecclesia Pascali papa secondo, quę communi consilio facta et definita in Cluniensi capitulo, coram me Hugone abbate, coramque toto conventu recitata est, firmiterque laudata. Unde quia ita est, et hęc commutatio ad utilitatem utriusque domus, Cluniensis videlicet et Marciniensis, facta est, volumus et ex parte Dei et beati Petri deprecamur, quatinus quod fecimus, fratres et successores nostri sic factum teneant, nec violare presumant. Si quis autem hoc institutum violaverit, et ad priorem statum reducere non erubuerit, videat ipse quid fecerit, nos tamen non alio eum ferientes gladio totum inter Deum et ipsum ponimus: unde pre omnibus Deum timeat; omnibus vero ita servantibus predictumque locum ubi sorores ille pro Deo pauperes factę sunt juvantibus, sit pax perennis et gaudium sine fine.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung