Henricus, Dei gratia, etc., archiepiscopis, episcopis, abbatibus, comitibus, baronibus, vicariis, ministris et omnibus fidelibus suis Anglie et Normannie, salutem. Sciatis me concessisse et confirmasse Deo et ecclesie beate Marie de Theffordia et monachis [meis] Cluniacensibus, ibidem Deo servientibus, pro anima patris mei Willelmi regis et matris meę, Matildis regine, et pro me ipso et uxore mea Matilde regina, et pro infantibus et omnibus parentibus meis, vivis et defunctis, et pro statu regni mei, quicquid eis donatum est, vel donabitur in regno meo, videlicet ecclesias, capellas, cimiteria, terras, decimas, homines, piscarias, nemora, et prata, et molendina, et omnia alia beneficia, et nominatim totam terram que fuit Alwi, quam Rogerius Bigot habuit et tenuit de patre meo, et totam terram in qua situm est monasterium Sanctę Marię novum, et totam terram quam comprehenderunt ad ortum suum et virgultum, et pratum juxta monasterium, et de tota terra sua infra burgum de Theffordia et extra, que fuit Alwi et que est in Feragertunenfelda, vel de aliqua terra que est circa Theffordiam prohibeo ne scottent. Et quicumque voluerint esse monachi cum illis vel jacere in monasterio eorum, vel in monasteriis que ad eos pertinent, libere et quiete recipiantur cum omnibus beneficiis que donaverint eis; et defendo super forisfacturam meam quod nullus eos inde disturbet, et quicquid olim tenuerunt aut in futurum largicione fidelium tenuerint, seu justis modis poterunt adipisci, bene et in pace et libere teneant, et si de aliqua re, quam unquam tenuissent vel in posterum tenuerint, sine judicio fuerint disseisiti, sine dilatione rescisiantur. Igitur predicti monachi mei teneant bene et in pace omnia tenementa sua, que eis concedo et confirmo, et nominatim de dono meo ecclesiam Sanctę Marię de mercato cotidiano, cum omnibus que ad eam pertinent, et que Albertus ibi dedit et tempore regis Edwardi tenuit, et ecclesiam de Gatestor cum omnibus pertinentiis suis, etc.