Notum sit cunctis parentibus meis et vicinis inter quos habito, quod ego Grimaldus miles, rediens ab itinere Hierosolimitano, et transiens per locum Cluniacense, cui domnus Hugo abbas preesse videtur, fecerim hujusmodi donum fratribus ibi degentibus, accepta ab eis in capitulo societate et fraternitate, et participatione bonorum omnium que inibi aguntur, et in aliis locis ad eum respicientibus et pertinentibus. Ego Grimaldus miles (Chrismon) (queratur hoc signum in memoriale, ubi canitur cotidie missa matutinalis cum nomine ejus) dono Deo et fratribus Cluniaco manentibus, post mortem meam, quicquid jure hereditario possidere videor, tali tenore et convenientia, ut memoriam mei, quoad vixero, in suis orationibus habeant et audito obitu meo ea persolvant michi que persolvenda sunt fratri et amico. Ad presens vero dono eis unciam auri unam. Si quis vero hanc donationem violare vel calumniare voluerit, iram Dei omnipotentis incurrat.