Charta qua notum est Walcherium de Salinis caldariam Aremberti monasterio Cluniacensi ad usum fratrum apud Mezges degentium dedisse.
Notum sit omnibus sancte Dei ecclesie fidelibus, domnum Walcherium de Salins, inter cetera beneficia ab eo loco Cluniacensi collata, dedisse eidem cenobio ad usum fratrum apud Mezges degentium, caldariam Arimberti in villa Salins, duos solidos et dimidium per unamquamque septimanam debentem, laudantibus filiis suis Humberto atque Hugone. Ex quo censu sex denarios fratri Cluniacensi salem deferenti in suo usu perpetuo dari delegavit; ac duos solidos, ut predictum est, fratribus de Mezges reddi constituit. Hujus doni adsunt testes Dalmatius Joret, camerarius Cluniacensis, et Stephanus, predicte obedientie Mezges decanus, et Gerardus, prepositus suus.