Terram de Bargis miserunt in vuadimonium monachis Sancti Petri Cluniacensis Graciago commorantibus Poncius Arnaldus et Girinus frater ejus pro LX solidis monete Valenciensis, laudante matre eorum Placentia et sorore eorum Helena, et filiis ac filiabus ipsius, tali convenientia, ut tempore quo redimi eam voluerint, reddant supradictis monachis eandem monetam, aut si ceciderit, monetam que eo die plus in hac terra valuerit et majoris precii fuerit, et a festivitate Sancte Marie que est februario usque ad tres annos. Testes qui huic convenientie interfuerunt: Umbertus Girinus, Berno de Mont, Walbertus presbiter, Girinus et Jaius, Walbertus de Meseres, Petrus Achardus, Dunelmus et Johannes, nepotes Walberti presbiteri. Fidejussores: Humbertus Girinus, Avitus de Vertamisia, filii Renconis, Girinus Jaius, Walbertus presbiter, qui fecerunt fidem tali convenientia, ut si unus eorum obierit, alteri pro ipso respondeant. Dederunt ergo milites supradicti Poncius et Girinus hanc terram tali tenore, ut ipsi malum terre non inferant; et si quis inferre voluerit, ab ipsis prout potuerint prohibeatur. Hec reticendum quod XII^cim denarii istius monete hoc tempore valent duos solidos et VI denarios Podiensis monete.