Cunctos intra sanctę ęcclesię gremium positos et precipue illos qui temporalibus diviciis abundant, divine legis pagina commonet dicens: «Vendite quę possidetis, et date helemosinam»; - «Facite vobis saculos non veterascentes, thesaurum non deficientem in cęlis»; et Dominus ad divitem: «Vade, vende omnia quę habes, et da pauperibus». Proinde ego Poncius miles de Soliniaco hac dominica ammonicione instructus, simulque considerans multitudinem peccatorum meorum, dono et concedo omnipotenti Deo et sancto Cluniacensi monasterio, cui domnus Hugo abbas preesse pariter ac prodesse videtur, partem quandam possessionis meę, quę dicitur Issartum Ritberti, cum omnibus quę inibi esse videntur, cultis videlicet et incultis, silvis et planis. Est autem ipsa terra in pago Matisconensi, sub custodia decani Galuniacensis villę. Quod donum laudavi et firmavi, et Poncia uxor mea in manu Stephani monachi ipsius villę decani. Signum Poncii militis. Signum Poncię, uxoris ejus. S. Hugoni, militis de Soliniaco. S. Arlebaldi, capellani Sancti Poncii. Si quis hoc donum ausus fuerit calumniari, æterno subjaceat anathemati, nisi legaliter pœnituerit. Petrus Cluniacensis ęcclesię armarius hanc edidit cartham.