In nomine sanctę et individuę Trinitatis. Noverint omnes filii sanctę ęcclesię, presentes et futuri, quod ego Nariodus, Eduensis episcopus, a Roma rediens, juxta peticionem Petri, domini papę Paschalis camerarii, pro remedio animę meę et pro salute totius mei episcopatus, dono Domino Deo et beato Petro Cluniensique cęnobio, ad locum scilicet Marciniacum, ęcclesiam Sancti Juliani in Briennensi territorio sitam, ut deinceps, sine omni calumpnia, Marciniaco pertineat ac respondeat, quatinus Deus omnipotens tam mihi quam omni diocesi mihi commissę pacem tribuat presentem et futuram, meque participem faciat bonorum omnium quę ipse fieri permittet in jam dicto cęnobio Cluniacensi ac Marciniacensi. Hoc donum fideliter feci apud Cluniacum, in manu domni Hugonis abbatis, tenens ejus baculum, et factum per presentem cartam confirmavi, anno Dominicę incarnationis M. C. V, indictione XIII, epacta III, videlicet XVIII kalendas februarii, presentibus ac testificantibus Wilencho, Lingonensi archidiacono, Willelmo, archipresbitero de Parriciaco, Girardo cognomine Meschino, sacerdote de Paredo, Pascali papa II Romanę ęcclesię presidente, Philippo Francorum rege superstite. Factum est hoc presentibus et audientibus domno Bernardo, Cluniacensi priore; Seguino camerario, Jarentone cellarario, Luca armario, cum multis aliis.