Reverentissimo patri domino Hu[goni] Cluniensium abbati, et toti congregationi Cluniensi illi commissę Hu[go], Lugdunensis ęcclesię servus, salutem. Scimus nos rogatu domni Petri, domini Pape camerarii, ęcclesiam Artensem vobis et ęcclesię vestrę olim dedisse. Qua de causa filii nostri canonici Lugdunensis ecclesię turbati, cęperunt instanter precari clementiam nostram, ne prefatam ęcclesiam Artensem pateremur aliqua occasione alienari et separari ab ęcclesia Sancti Stephani Lugdunensis, juris cujus ab antiquis temporibus fuerat. Quorum clamoribus ac precibus flexi, promisimus jam dicto domno P[etro] pro Artensis ęcclesię commutatione nos daturos vobis ęcclesiam de Sancto Germano, quę sita est intra ęcclesiam de Capella et ęcclesiam de Marlico. Quam promissionem nunc perficientes, concedimus vobis et ęcclesię Cluniensi supradictam ęcclesiam Sancti Germani jure perpetuo possidendam, retinentes in ea synodales census et censum alium quem beatę memorię domnus Gibuinus, archiepiscopus, in illa imposuit, obędientiam quoque et reverentiam episcopalem, sicut in cęteris ęcclesiis quas beato Petro concessimus. Signum Girini decani. S. Girini capellani. S. Gausceranni cantoris. S. Arnaldi magistri. S. Godonis canonici et archipresbiteri. S. Teotardi camerarii. Actum Lugduni, anno incarnationis Dominicę M. C. VI, indictione XIIII. (Trace de sceau plaqué)