CCE: cartae cluniacenses electronicae
Database of the Charters of the abbey of Cluny (802-1300)

BB 3854     View  [Back]
Privilegium Paschalis papæ II, quo confirmat possessiones monasterii Sanctæ Mariæ de Caritate.
Paschalis, episcopus, servus servorum Dei, dilecto in Christo fratri Odoni, priori monasterii Sancte Marie, quod de Caritate dicitur, et ejus fratribus salutem et apostolicam benedictionem. Ad hoc in apostolice sedis regimen, Domino disponente, promoti conspicimur, ut ipso prestante religionem augere, et ejus servis tuitionem debeamus inpendere. Igitur pro beate Marie semper virginis reverentia, et tam pro vestra spectabili religione, quam pro venerabilis fratris nostri Hugonis, Cluniacensis abbatis, dilectione, ad cujus curam ex Cluniacensis cenobii jure locus vester pertinet, vestris, o filii karissimi in Christo, petitionibus non difficulter accommodamus effectum. Predecessoris siquidem nostri sancte memorie Urbani secundi vestigiis insistentes, tam vos quam monasterium vestrum sedis apostolice auctoritate munimus. Quod videlicet monasterium, eodem venerabili fratre Hugone rogante, nos, currente indictione quinta decima, auctore Deo, nostris manibus consecravimus. Statuimus itaque ut quecumque hodie idem cenobium juste possidet, sive in futurum juste atque canonice poterit adipisci, firma vobis vestrisque successoribus et illibata permaneant, in quibus hec propriis nominibus duximus exprimenda: in Altisiodorensi episcopatu, ecclesiam de Cona, de Aona, de Beluciano, ecclesiam Sancti Lupi, Sancti Petri de Boniaco, cum ipsa villa; in episcopatu Senonensi, ecclesiam de Cavarias, ecclesiam de Brenca, de Monteboio, de Castellione, de Diciaco, de Contentione, de Venedeio, ecclesiam de Cruce, Sancti Sidronii, Sancti Ionii, ecclesias de Joviniaco, et in suburbio ecclesiam Sancte Marie; in episcopatu Bituricensi, ecclesiam de Cenconio cum burgo, de Monastellione cum burgo, de Orolio, item de Orolio, de Birreto, cappellam de Monte Falconis, de Valeniaca, de Fontiniaco castro, de Nerunda, de Ulmeriaco, de Coola, Sancti Sulpicii juxta pontem Ligeris, Sancte Montane, Sancti Celsi; in Aurelianensi episcopatu, ecclesiam de Orolio, Sancti Laurentii in suburbio; in Nivernensi episcopatu, ecclesiam de Galliaco, de Colongiis, de Bisca, ecclesiam Sancti Honorati, Sancti Sulpicii, Sancti Victoris in suburbio; in episcopatu Eduensi, ecclesias de Rocca, de Monte Ansberti, cum villa de Lameneia, de Viverio in suburbio, ęcclesiam Sancti Rozzi; in Meldensi episcopatu, ecclesiam de Rodolio; in Trecensi episcopatu, ecclesias de Sedana, Sancti Justi; in Belvacensi, ecclesiam Sancti Cristofori de Araciis cum appendiciis suis; in Suessionensi, ecclesiam de Brena foris castrum, de Villeriis, de Montemauro; in Carnotensi, ecclesiam Sancti Salvatoris in suburbio; in Rotomagensi, ecclesiam de Longa Villa; in Anglica terra, ecclesiam Sancti Salvatoris de Bermundisia, de Noantona, de Ponte Fracto, ecclesiam Sancte Milburgis cum universis possessionibus et appendiciis suis. Preterea decernimus ut nulli omnino hominum liceat idem cenobium temere perturbare aut ejus possessiones auferre vel ablata[s] retinere, minuere vel temerariis vexationibus fatigare, sed omnia integra conserventur eorum pro quorum sustentatione et gubernatione concessa sunt usibus omminodis {corr: omnimodis} profutura. Hoc quoque presenti capitulo subjungimus, ut nulli episcopo liceat in vos et locum vestrum, qui videlicet de Caritate nominatur, ultionem excommunicationis exercere, quatinus ab omni servitii secularis infestatione securi, omnique gravamine mundane oppressionis remoti in sancte religionis observatione seduli ac quieti, Domino annuente, permaneatis, salva in omnibus Cluniacensis abbatis reverentia et obedientia, ad cujus gremium locus idem tanquam cella noscitur pertinere. Si qua sane, etc. ... Amen. Ego Paschalis, catholice ecclesie episcopus, subscripsi. Datum apud monasterium Dolense, per manum [Equicii], agentis vices cancellarii, XVII kalendas aprilis, indictione XV, incarnationis Dominice anno M.C.VI, pontificatus autem domni Paschalis secundi pape VIIIo.
(Au dos:) Privilegium de Caritate.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung