Charta qua Thebaldus de Rubeo Monte dat monachis Cluniacensibus ecclesiam de Valle Clusa.
Cunctos fideles in Christum credentes decet et hoc proprium debent habere studium, ut de bonis a Deo sibi collatis aliquod Deo servientibus impendant beneficium, quatinus Deum possint habere propitium. Quapropter ego Thebaldus de Rubeo Monte, ut possim abluere enormitatem peccatorum meorum, dono et concedo Domino Deo et beatis apostolis ejus Petro et Paulo et Cluniacensi cęnobio cui domnus Hugo abbas preest, per manum domni Hugonis, prioris de
Mortua Aqua, monasterium Vallis Clusæ, laudantibus universis ejusdem ęcclesię clericis, laudantibus etiam cognatis meis, domni Guelfonis filiis, Guillelmo et Amadeo, cum matre eorum, nomine Raimodę, rogatu ętiam casatorum meorum Ilirici et Richardi, fratris ejus, Uzonis, cognomento Pagani, et universorum ejusdem æcclesiæ servorum. Hanc donationem facio ego pro remedio animæ meę, patris et matris meę et universorum antecessorum seu successorum meorum, et pro remedio animarum omnium clericorum et predictorum casatorum, et cunctorum fidelium vivorum seu defunctorum. Facta est autem hęc donatio apud Mortuam Aquam, anno ab incarnatione Domini millesimo C.VII, feria II
a Dominicę resurrectionis, Paschali secundo Romanam æcclesiam regente; presentibus testibus domno Pontio Trevensi, Gualone de Novo Castello, Gaufredo Trevensi, Geraldo sescalco suo, Othone de Mandodro, Rotberto Capello, Guidone de Perciaco. Si quis vero (quod non credo) ausu temerario hanc nostram donationem violare temptaverit, primitus iram omnipotentis Dei omniumque sanctorum incurrat, et nisi male temptata digne emendaverit, ęterno cruciandus incendio, æterno regno in perpetuum privetur.