Anno Dominicę incarnationis millesimo centesimo septimo, medio mense augusto, indi[c]tione X^a V^a. Ego, in Dei nomine, Contissa, veste velaminis sanctę religionis induta, et relicta quondam Azonis, qui fuit dictus Crassus, de civitate Mediolanensi, quę professa sum lege vivere Romana, presens, presentibus dixi: «Dominus omnipotens ac redemptor noster animas quas condidit, ad studium salutis semper invitat,» et ideo ego quę supra Contissa volo et judico seu per hanc paginam ordinationis meę inviolabiliter confirmo, ut omnes res territorię juris mei, quas habere visa sum in loco et fundo seu monte qui dicitur Brianza, ad locum ubi dicitur Infigina, presenti die et hora deveniant in jure et proprietate monasterii ęcclesię Beati Petri apostoli, quod est constructum et ędificatum in loco qui dicitur Cluniea, in quo scilicet loco, de suprascripto loco Brianza ad jam dictum locum qui dicitur Infigina, ego que supra Contissa volo et dispono edificare seu ordinare ęcclesiam unam in honore beati confessoris Nicholai et cellam unam juxta ipsam ecclesiam, que amodo et deinceps ipsa ęcclesia et cella semper sit sub cura et regimine seu potestate et defensione ipsius monasterii et ęcclesię Sancti Petri, que dicitur in Cluniea, sine regimine et potestate alicujus cellę, sed semper ipsa ecclesia et cella predicti Sancti Nicholai una cum jam dictis omnibus rebus territoriis specialiter permaneat in potestate et regimine seu defensione ipsius monasterii Sancti Petri: eo tamen ordine, ut monachi et officiales ipsius ęcclesie Sancti Nicholai habeant et teneant predictas res omnes quę superius leguntur, faciendum exinde de frugibus et reditibus, qui de ipsis rebus annualiter exierint, ad eorum communem utilitatem quodcumque voluerint; ita tamen ut jam dicti monachi et officiales ipsius ęcclesię seu celle Sancti Nicholai qui nunc et in perpetuum in eadem ecclesia seu cella fuerint, persolvant annualiter fictum pro benedictione, pro ipsis rebus, argenti denarios Mediolanenses solidos quinque ad partem ipsius monasterii Sancti Petri, quod dicitur in Cluniea, pro mercede et remedio anime meę, quę supra Contissę et ipsius quondam Azonis, qui fuit vir meus, quia decrevit mea bona voluntas; et nec mihi liceat amodo ullo tempore nolle quod volui, sed quod a me hic semel factum vel conscriptum est inviolabiliter conservare promitto, cum stipulatione subnixa. Actum in suprascripta civitate Mediolanensi. Signum manus suprascriptę Contissę, quę hanc cartam judicati ut supra fieri rogavit. Signum manuum Alexandri et Arnaldi germanorum, lege vivencium Romana testium. Signum manuum Arderici et Nazarii atque Maifredi testium. Ego Anselmus judex interfui et rogatus subscripsi. Ego Ardericus notarius sacri palacii scripsi, post traditum complevi et dedi.