Notum sit amantibus veritatem et pacem, quod ego Vuido de Vuangionis Rivo, pro remedio animę meę et uxoris meę Beatricis et filii mei Widonis, et patris mei Vuidonis eque de Vuangionis Rivo, dono et offero Deo et sanctis apostolis Petro et Paulo ad locum Cluniacum, per concessionem et laudamentum donni Rotberti, Linguonensis episcopi, in æcclesia apud Columberum villam, quam dicunt ad Duas Ecclesias, partem illam quam presbiteratum vocamus, et medietatem decimę totius villę, et terratium tam de bosco quam de plano, et plaustinatium et mel et ceram quantum ad me pertinet vel ad heredes meos pertinere poterat, simulque quosdam homines meos, Joscelmum scilicet cum liberis suis, filios Bernoardi, Vuarnerium molendinarium cum liberis suis, Tedbaldum sutorem. Quod in his habeo, hoc utique in hac donatione appono, et in Ranoponte piscatorem unum quod in illo habeo; servos et ancillas meas apud Mundam Villam et apud Campaneolas, de his utique partem meam in hac donatione appono. Factum est hoc apud Vuangionis Rivum publice, regnante Ludovico rege Francorum, Rotberto episcopo Linguonum, Pontio abbate Cluniacensium.