Litteræ Aimerici, Claromontensis episcopi, ad Pontium (?), Cluniacensem abbatem, quibus ecclesiam Uzonensem Celsiniacensi priori perpetuo possidendam se concessisse nuntiat.
Venerabili patri et domino, P. Dei gratia Cluniacensi abbati, A[imericus,] Claromontensis ecclesię humilis minister, salutem et sinceram dilectionem. Reverende paternitati vestrę ac caritati hactenus nobis exibite deesse in his quę postulat nec debemus, nec possumus. Indignum etenim valde arbitramur, si tanta persona, in his quę persolvere valemus, apud nos repulsam paciatur. Ea propter petitioni vestrę, quę per venerabilem priorem Cluniacensem Armannum nobis facta est, annuimus, Uzonensem ecclesiam cum omnibus ad eam pertinentibus et perpetuo possidendam Celsiniensi priori et omnibus successoribus ejus concessimus, salvo jure Claromontensis ecclesię et omnium episcoporum ejus, et retenta censura decem solidorum Podiensium vel quinque Claromontensis monete, qui annuatim Claromontensi episcopo persolvantur.