«Vexillum Christi carte preponitur isti, per cujus donum permanet omne bonum». - In nomine sancte et individue Trinitatis. Ego Adalardus, de Morniaco dominus, do, tribuo, et concedo locum qui vocatur Butza, necnon etiam terras et locum in quo molendinus fuit, et omnia illa que pertinere concessi heremitis, Domino Deo et beate Marie semper virgini, genitrici ejus, et sanctis apostolis Petro et Paulo Cluniacensis, domnoque Poncio abbati, sanctoque conventui, pro redemptione anime mee, patris ac matris, fratrum, filiorum, parentumque omnium meorum, tali pacto, talique conventione, ut locus iste non exeat de manu sua, nec de potestate conventus Cluniensis ecclesie, sed semper sit in ordinatione et providentia tam presentium monachorum ecclesie Sancti Salvatoris de Broleto quam futurorum. Ego frater Hugo, et socius noster Johannes, qui ecclesiam de Butza pertinemus, et predictas res que huic ecclesie pertinent, ex dono ab ipsoque Aleardo accepimus, similiter concedimus. Iterum ego Adalardus duoque filii mei Gonbaldus et Helias, et frater meus Helias, simul concedimus. Hoc donum fuit factum apud Broletum, in ecclesia Sancti Salvatoris, super altare, VIII idus marcii, anno millesimo centesimo XXI ab incarnatione Domini, luna V. Ista carta fuit facta regnante Calixto papa II in sede apostolica, Ludovico rege dominante in Francia, Willelmo duce Aquitanorum, et comite Pictavorum, Petro episcopo Sanctonice sedis residente in cathedra. † S. Helie, filii Aleardi, qui hanc crucem fecit infra castrum Morniacense. † S. Gonbaldi, filii Aleardi, qui hoc donum concessit. Hec donatio fuit facta videntibus et audientibus Aimerico de Fort, Wardrardo de Bria, et Willelmo Gombaldo, fratre ejus. † S. Adalardi de Morniaco, qui hoc donum fecit. Isti sunt monachi qui viderunt: Helias monachus, qui tunc tenebat domum de Broleto; Willelmus monachus; Helias monachus; Willelmus monachus; Petrus monachus. † S. Hugonis heremite, qui hoc donum concessit. Petrus capellanus, qui hoc vidit; Stephanus diaconus, qui hoc audivit.