In nomine sancte Trinitatis, presentibus et futuris notum facimus, quoniam Robertus Dalmacii, filius iterum Roberti Dalmacii, mansum de Columnis, quem pater ejus Deo et Sancto Petro, pro anime sue mercede, contulerat, et quem idem Robertus, filius ejus, sibi injuste vendicabat, presencia bonorum virorum, quorum nomina inferius posita sunt, sub jurejurando in manus monachorum Sancti Petri Cluniacensis, vuerpivit et omnino refutavit in manu scilicet Petri camerarii, Bernardi cellerarii, Hugonis de Cresciaco, et Willelmi, decani de Besorniaco; mansum item de Mineria, quem avunculus illius, Dalmacius de Centarben, Deo contulerat, et quem predictus auferebat, in quem malas consuetudines requirebat, sub eisdem testibus, in eisdem manibus, sub dicto sacramento refutavit, retentis ibi solummodo duobus bichetis de avena; item molendinum de Vandenessa, quod mater ejusdem Rotberti, pro anima sua, beato Petro obtulerat, et quod ipse auferebat, eodem quo prediximus modo sub testibus, cum juramento condonavit, nullis usibus ibi retentis, excepto quod semel aut bis in anno, si voluerit aut necessitas illi fuerit, in aquis ejusdem molendini piscari debebit, id tamen nunquam pro damno monachorum sive molendini facere temptabit; eodem sacramento idem Rotbertus se obligavit et prepositus ejus Walterius et forestarius et cellarius ipsius, quod super predictis mansis et molendino Beato Petro et suis integram teneant pacem, et si eam aliquo modo fregerint, infra XL dies postquam domnus abbas per se vel per suum quemlibet nuntium racionaverit, eum emendare habebit, et si hoc tam cito non poterit emendare, se ipsum cum his qui secum juraverunt in castro Carella vel in Secegio obsidem dabit, inde non exiturus absque licencia domni abbatis vel alicujus nunciorum ejus, si prius non emendaverit. Presentes testes fuerunt: Leotbaltus de Digonia, Ademarus Morellus, Petrus de Civegnone, Girardus, filius Ledbaldi de Digonia, Senebrunus, Hugo Rabia, Gauffredus de Villa Urbana, Anselmus de Semeliaco, Hugo de Valle, Gerardus de Allento, Jocerannus, prepositus de Besorniaco, Bernardus, prepositus de Columnis, et Bernardus, filius ejus. In villa de Columnis predictus Rotbertus Dalmacii malas consuetudines immiserat et convictus placito universa abdicavit predictorum manibus, exceptis duabus currvatis in anno et una ligatura vel fasce feni ab uno quoque villano, tali tamen qua scutarius ejus vel in collo suo vel in collo runcini sui possit portare; pro his que supradicta sunt malis atque invasionibus predictus Rotbertus Dalmacii recepit a domno et venerabili Petro, abbate Cluniacensi, sex denariorum libras. Anno ab incarnatione Domini millesimo centesimo XXVIII, mense augusto feliciter. Hanc kartulam Rotbertus Dalmacii fieri jussit VIII kalendas augusti, in loco de Columnis, in casa habitationis Bernardi prepositi, in qua placitum definitum est.