Innocentius, episcopus, servus servorum Dei. Dilecto filio Guilielmo, abbati monasterii sanctorum Gervasii et Protasii, quod situm est in Arelatensi provincia, secus oppidum Fossas, ejusque successoribus substituendis regulariter in perpetuum. Desiderium quod ad religionis propositum et animarum salutem pertinere monstratur, auctore Deo, sine aliqua est dilatione complendum. Quam ob rem, dilecte in Domino fili Guilielme, abbas, tuis postulationibus clementer annuimus, et sanctorum martyrum Gervasii et Protasii monasterium cui, Deo auctore, presides, juxta exemplar predecessorum nostrorum felicis memoriæ Sergii et Paschalis, Romanorum pontificum, apostolicæ sedis patrocinio communimus. Statuentes ut quæcunque possessiones ad idem cenobium in presentiarum juste et legitime pertinere noscuntur, aut in futurum concessione pontificum, largitione principum, oblatione fidelium, seu aliis justis modis, prestante Domino, poterit adipisci, firma tibi tuisque successoribus et illibata permaneant. In quibus hæc propriis nominibus duximus annotanda, videlicet æcclesias de castello Ereas, cum decimis et oblationibus per episcopos concessis, cella Sanctæ Mariæ de Plano, cella Sancti Gervasii, Sanctæ Mariæ Almianarræ, Sanctæ Eulaliæ, Sancti Nykolai, Sancti Vincentii, Sancti Salvatoris; in episcopatu Forojuliensi, æcclesia Sancti Stephani de Castro Duplo, Sancti Mitrii de Monteferrario, Sancti Victoris, Sancti Vincentii in castro quod dicitur Trani, Sanctæ Mariæ de Flaiosco; in episcopatu Massiliensi, ecclesia Sanctæ Mariæ [et] Sancti Vincentii; in episcopatu Arelatensi, æcclesia Sancti Mitrii, Sancti Vincentii, Sancti Petri, Sanctæ Trinitatis, Sancti Juliani et Sanctæ Ceciliæ; in episcopatu Cabilonensi, æcclesia Sancti Gervasii; in episcopatu Atensi, æcclesia Sancti Marcellini; item in episcopatu Forojuliensi, æcclesia Sancti Martini de Blancaforte, cum omnibus ad ipsas æcclesias pertinentibus. Decernimus ergo, ut nulli, etc.; missas sane publicas in eodem monasterio per episcopum fieri, vel stationes celebrari, preter abbatis ac fratrum voluntatem omnimodo prohibemus, ne in servorum Dei recessibus, popularibus occasio prebeatur ulla conventibus; hoc quoque presenti decreto subjungimus, ut ipsum monasterium et ejus monachi ab omni secularis servitii sint infestatione securi, omnique gravamine oppressionis mundanæ remoti, quatenus in sanctæ religionis observatione seduli, nulli alii nisi Romanæ apostolicæ sedi, cujus juris est, aliqua teneantur occasione subjecti. Ad indicium autem percepte a Romana æcclesia libertatis, sex nummos argenteos quotannis Lateranensi palatio persolvetis. Si qua igitur in futurum ecclesiastica, etc. Amen. Amen. Amen. Ego Innocentius, catholicę ecclesię episcopus, subscripsi. Ego Guilielmus, Prenestinus episcopus, subscripsi. Ego Johannes, tituli Sancti Grisogoni presbiter cardinalis, subscripsi. Ego Petrus, cardinalis, presbiter tituli [S.] Equitii, subscripsi. Ego Romanus, diaconus cardinalis Sanctę Marię in Porticu, subscripsi. Ego Gregorius, diaconus cardinalis sanctorum Sergii et Bachi, subscripsi. Ego Guido, diaconus cardinalis beatissime Marie in Via Lata, subscripsi. Datum aput Sanctum Egidium, per manum Aimerici, sanctæ Romanæ ecclesie diaconi cardinalis et cancellarii, III id. septembris, indictione VIII, incarnationis Dominice anno M^o C^o XXX^o, pontificatus vero domni Innocentii secundi papæ anno I.