S[amso], Dei gratia Remorum archiepiscopus, carissimo fratri N[icolao] Cameracensis ecclesiæ venerabili episcopo, salutem et dilectionem in Domino. Ad mandatum domini papæ Lucii, bonæ memoriæ, et vos et abbatem Sancti Johannis de Valentianis, et Hugonem, priorem Beati Salvii, ante nos evocavimus. Et quia abbas privilegia authentica vel rationabilia argumenta concordiæ per vos factæ obviantia nequaquam protulit, sicut in præsentia domini papæ se prolaturum asseruit, mandato ipsius papæ debitam exhibentes obedientiam, concordiam per vos factam metropolitana auctoritate confirmamus, sollicitudini vestræ mandantes et præcipientes ut eam inrefragabiliter observari faciatis. Valete.