S[amso], Dei gratia Remorum archiepiscopus, universis ecclesiæ filiis in perpetuum. Felicis memoriæ Lucius papa per apostolica scripta nobis mandavit, quatinus ascito nobiscum venerabili confratre nostro N[icolao] Cameracensi episcopo, et aliis discretis et religiosis viris, si abbas Sancti Johannis de Valentianis, ut ante ipsum papam asseruit, privilegia authentica vel rationabilia argumenta concordiæ per predictum episcopum factæ obviantia proferret, causam ipsius et Hugonis, prioris Sancti Salvii audiremus, et remoto appellationis subterfugio, media æquitate diffiniremus; alioquin eandem concordiam, sicut per eundem episcopum facta est, faceremus observari. Nos itaque et prædictum episcopum et abbatem Sancti Johannis et priorem Sancti Salvii ante nos evocavimus. Abbas vero privilegia authentica vel rationabilia argumenta concordiæ per episcopum factæ obviantia nequaquam protulit. Eapropter apostolico mandato debitam exhibentes obedientiam, concordiam per episcopum factam metropolitana auctoritate confirmamus, prædicto episcopo Cameracensi mandantes et præcipientes ut eam inrefragabiliter observari faciat. Ut autem hæc nostra confirmatio pondus auctoritatis habeat, et rata et inconvulsa maneat, sigilli nostri impressione et probabilium personarum attestatione illam muniri præcepimus. S. Gosleni, Suessionensis episcopi. S. Bosonis, archidiaconi. S. Leonis, decani. S. Gervatii, cantoris. S. Gregorii et Rogerii, presbyterorum. S. Symonis, Senonensis archidiaconi, Drogonis, et Guermundi, diaconorum. S. Guidonis, Rogeri et Bosonis, subdiaconorum. Actum Remis, incarnati Verbi anno MCXLV, indictione VII, regnante gloriosissimo Francorum rege Ludovico anno VIII, archiepiscopatus autem domni Sansonis anno VI.