Notum sit omnibus in manibus quorum hæc carta pervenerit, quod ego Amedeus, Lugdunensis archiepiscopus, apostolicæ sedis legatus, domini papæ urgente mandato, venerabiles Cluniacenses fratres et Jocerannum Grossum ad diffiniendam controversiam quæ inter eos diu agitata fuerat ante meam evocavi præsentiam. Utraque itaque parte ante nos constituta, allegaverunt Cluniacenses prædictum Jocerannum in Cluniacensis ecclesiæ terris, quæ sub ejus fuerant potestate, graves injurias et exactiones fecisse, hospitia quæ antecessores ejus in eis non habuerant violenter exegisse, rapinis et talliis diversisque infestationibus eorum homines graviter oppressisse. Econtra Jocerannus aiebat nil in eorum terris accepisse, nisi ea quæ more consuetudinario antecessores sui in eis acceperant. Auditis igitur utriusque partis rationibus, et consilio religiosorum virorum Eraclii, archidiaconi, Willermi de Marzeu, magistri Otmarii, Girberti, archipresbyteri, testibus, quos Cluniacenses produxerant, diligenter præstito sacramento testificati sunt quod Jocerannus in prædictis ecclesiæ terris nullam penitus vim nullasque exactiones de more inferre debebat. Testimonio quorum Joceranni testes non contradixerunt. Præterea ecclesiæ testes asseruerunt quod, ipsis præsentibus et audientibus, Bernardus, prædicti Joceranni pater, cum Ierosolymam in domum Hospitalis, ubi se donaverat, ire disponeret, in Cluniacensium fratrum et aliorum multorum præsentia, non solum consuetudines ullas in prædictis ecclesiæ terris se non habere asseruit, verum etiam Joceranno et Henrico filiis suis, qui præsentes aderant, ne injurias aliquas aut exactiones in præfatis ecclesiæ terris deinceps inferre præsumerent evidenter præcepit; qui si ejus mandato non obedirent, paternam hereditatem eis interdixit. Quibus auditis, et communicato illorum consilio qui ibidem nobiscum aderant, per sententiam protulimus ut Jocerannus de illatis injuriis prædictis fratribus satisfaceret, et se a talibus exactionibus deinceps compesceret; neque enim in terris eorum de more talem habebat potestatem.