CCE: cartae cluniacenses electronicae
Database of the Charters of the abbey of Cluny (802-1300)

BB 4117     View  [Back]
Charta qua Petrus de Aura et tota familia ejus vendunt monasterio Cluniacensi molendinum de Rocha Tallata.
In nomine Domini, anno ejusdem incarnationis Mo Co XLo VIIo, in mense aprili, regnante Lodoico rege Francorum, sit per hanc cartam notum omnibus hominibus, quod ego Petrus d'Aura et ego Guillerma, ejus uxor, et nos eorum infantes, Petrus, Guillermus, Pontius, Raimundus, Guillerma, omnes insimul, cum consilio Bernardi d'Aura, bona fide et sine dolo et absque ulla retentione, vendimus et titulo venditionis in perpetuum tradimus Deo et Beato Petro Cluniacensi, et tibi, Petro, ejusdem monasterii abbati, et omnibus monachis presentibus et futuris, ad omnes voluntates vestras, dandum, vendendum, impignorandum, vel quo alio modo volueritis alienandum, cum consilio tamen Petri de Cornone et Bertranni de Sancto Juliano, et fratrum suorum, Bernardi Petri et Rebuf, scilicet unum molendinum cum omni jure suo et cum omnibus suis pertinenciis et que pertinere debent. Qui predictus molendinus vocatur Rocha Tallata, et est in fluvio Lesi, juxta molendinum Bertranni de Insula, qui vocatur Joet. De hoc vero predicto molendino dabitis tantum, pro usatico, XIIcim denarios filiabus Petri Dalmatii de Castronovo, et nullum alium usaticum vel servitium inde facietis. Propter autem hanc venditionem et traditionem molendini predicti cum jure suo et cum suis pertinentibus, dedistis nobis jamdictis LX marchas argenti fini, sicut inter nos fuit conventio, et nichil remansit apud vos in debito. Hoc fuit factum cum consilio Petri de Cornone, et habuit inde CC. L solidos, et cum consilio Bertranni de Sancto Juliano et fratrum suorum predictorum, et habuerunt inde VI marchas argenti. Qui omnes predicti laudaverunt supradictis monachis et laudare fecerunt a fevalibus suis, videlicet: Bernardo de Insula et uxore sua Bonafos et filio eorum Guille[l]mo, et a Poncio de Albananicis et uxore sua Amorosa, et a Guillelmo Gauterii de Crecio et uxore sua Mabilla, quicquid juris ibi habebant, salvo tantum usanco (?) II solidorum et consilio. Similiter ego Petrus d'Aura promitto et convenio per me et per heredes meos vobis predictis monachis, presentibus et futuris, quod si aliquis homo vel femina aliquid ampararet vel auferret in hoc predicto molendino, per me vel per meos, totum vobis jure restituam, et inde dono vobis regressum super omnes res meas ubicumque sint. Hujus rei testes sunt: Guillelmus Siguini, Guillelmus Laterici, Augerius de Natres (?), Petrus de Naires, Guillelmus de Naires, Deodatus de Sauzeto, Guillelmus [et] Stephanus, filii ejus, Pontius de Carcassona, Guillelmus Salomonis, Guasco Orgerii, Guillelmus [et] Petrus, filii ejus, Guillelmus Augerii, filii Guiraldi Augerii, Petrus Porcelli, Johannes Pipini, Bernardus Brunonis. Similiter ego Bernardus, comes Melgorii, et ego Beatrix, comitissa, ejus uxor, per nostros (sic) vel per nostros, laudamus, concedimus et consiliamur totum hunc molendinum predictum, cum omni jure suo et cum omnibus suis pertinentibus tibi, Petro, Cluniacensi abbati, et omnibus monachis ejusdem monasterii, presentibus et futuris, salvo tantum censu predicto et con[sil]io Petri de Cornone et Bertranni de Sancto Juliano et frat[r]um suorum predictorum, et concedimus et convenimus vobis quod propter aliquod forifactum predictorum feudatariorum nostrorum, nullam molestiam, nullam exactionem vel peticionem vobis nec in hoc molendino faciamus, excepto censu supradictorum II solidorum, et propter hoc dedisti michi Bernardo comiti predicto CC. LX solidos, et michi Beatrici comitisse C. solidos. Hujus rei testes sunt: Pontius de Obillonis, Olivarius de Melgono (?), Petrus Almera, Guillelmus Otonis, Guillelmus Siguini, Bernardus de Piniano, Guillelmus de Oor, Guillelmus de Sabrano, prior Sancti Saturnini, Ugo, cellarius Cluniacensis, Pontius Siguini, Raimundus, monachus, Johannes de Meiolano, Leodegarius de Monte Acuto. Quando vero Petrus de Aura dedit supradictum regressum in omnibus rebus suis, fuit factum in presentia et audientia domni Guillelmi Montis Pessulani et Guillelmi, filii ejus, et Maurini, et Pontii de Carcassona, et predictorum monachorum. Poncius Bega dictavit hanc cartam.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung