Quæ alta temporum profunditate in oblivionem devocari pertimescimus, præsenti scripto memoriæ posterorum commendare gaudemus. Notum itaque fiat quod Hugo de Calmonte pro remedio animæ suæ quicquid in villa de Lurciaco juste vel injuste possidebat, seu nomine gardæ, vel quolibet alio titulo, Deo et ecclesiæ Cluniacensi donavit, ceteraque beneficia, quæ Aicardus de Montemerulo et Girberga, soror ejus, et Fulcardis, mater eorum, pro salute animarum suarum eidem ecclesiæ Cluniacensi contulerant, donavit et concessit, quicquid videlicet in villa de Licrans habebant, et mansum de Coet cum appendiciis suis, et mansum de Verzil cum appendiciis suis. Hoc autem Guillerma, soror prædicti Hugonis, et Hugo de Roorterio, filius ejus, laudaverunt et confirmaverunt. Nihilominus manifestum fieri volumus, quod prædicta Guillerma, pro requie æterna habenda, in die obitus, Deo et Cluniacensi ecclesiæ donavit quicquid in villa de Sapes et in appendiciis ejus habebat, et columgiam de Ibleris cum appendiciis suis, et mansum de Veteri Curia cum appendiciis suis, et mansum de Morons, quod eis in vita sua pro octo libris obligaverat, ea videlicet pactione, ut quadringentos solidos Hugoni Palatino, pro debitis suis, et Hugoni de Calmonte solvendis redderent; quod ita factum est. Sciendum vero est quod prædictus Hugo de Roorterio, antequam hanc donationem in manu domini Humberti, Lugdunensis archiepiscopi, et præsentia ipsius capituli laudare vellet, quemadmodum se facturum promiserat, sex libras a præfata Cluniacensi ecclesia habuit. Quibus susceptis, in manu domini Humberti, præfati Lugdunensis archiepiscopi, hoc donum, nihil ibi retinens, laudavit et concessit, et hanc cartam sigillo domini archiepiscopi et sigillo Lugdunensis ecclesiæ muniri præcepit. Hujus rei testes sunt: Eraclius, archidiaconus; Petrus Berardi; Johannes, archipresbyter de Sandrans; Robertus, presbyter de Saviniaco; Hugo de Valens; Willermus de Chaloutis; Petrus Rufus de Chavaliaco; Petrus Guichardi; Hugo Palatinus; Hugo de Sayo; Hugo de Marchia; Robundus de Molun; Gaufredus Martini; Petrus de Vissiliaco, prior Montis Bertrandi; Guido de Marchia, monachus; Bernardus de Sandrens, monachus; Bernardus de Vilula, monachus. Quod autem hæc carta in capitulo Lugdunensi ab Hugone de Roorterio laudata et confirmata sit testes sunt: Mallenus, decanus; Gerinus, præcentor; Gerinus, senescalcus: Guido, sacrista; Poncius, magister; Aimo de Rivoria; Hugo Oliverius; Petrus, archipresbyter de Raseio; Petrus de Borbone, et plures alii. Hoc autem factum est anno ab incarnatione Domini M.C.XL.VIIII, pridie nonas novembris.