Humbertus, Dei gratia Bisontinensis archiepiscopus, Petro venerabili abbati Cluniacensi ejusque successoribus regulariter substituendis in perpetuum. Ex injuncto nobis a Deo pontificalis dignitatis officio admonemur ecclesiarum paci et utilitati quantum possumus, Domino auxiliante, providere. Quod utique efficaciter implere sufficimus, si majorum nostrorum et maxime Romanorum pontificum vestigiis inhæremus. Hinc igitur quod a domino papa Eugenio de Balmensi ecclesia et ejus pertinenciis statutum est, quod videlicet propter scelus, quod Balmenses monachi ad contemptum sanctæ Romanæ ecclesiæ in magistrum Otbertum ausu sacrilego commiserunt, et propter religionis defectum, quæ ibi maxime deperierat, loco ipsi nomen et dignitatem abbatiæ in perpetuum abstulit, vobisque et per vos Cluniacensi ecclesiæ perpetuis temporibus in prioratum ordinandum dedit, ratum et inconvulsum manere volumus. Donamus itaque præfatam ecclesiam Balmensem cum omnibus appendiciis suis et libere et quiete, quemadmodum a domino papa factum est, vobis et ecclesiæ Cluniacensi perpetuo possidendam concedimus, salvo jure et reverentia Bisontinæ ecclesiæ et nostra et successorum nostrorum et justitia tam in spiritualibus quam temporalibus. Actum Bisontii, anno ab incarnatione Domini M. C. XL. VIIII, indictione XI, in præsentia domini Guidonis presbyteri cardinalis tituli sanctorum Laurentii et Damasi. † Ego Humbertus, Bisontinensis archiepiscopus, subscripsi. Ego Landricus subscripsi. W. decanus. Ego Wido, major archidiaconus, subscripsi. Ego præcentor subscripsi. Ego Stephanus, archidiaconus, subscripsi. Ego Guido, archidiaconus, subscripsi. Ego Guido, archidiaconus. Ego Guido, archidiaconus, subscripsi. † Ego Vilancus, archidiaconus, subscripsi. Ego Guillermus de Auguos subscripsi. Ego Wubo de Vallibus subscripsi. † Ego Petrus de Sancto Mauricio subscripsi. Ego Johannes Maltalans subscripsi. Ego Nicolaus, decanus, subscripsi. Ego Albertus, decanus, subscripsi. Hujus rei testes sunt: Enguizo, camerarius abbatis Cluniacensis; Arnaldus, capellanus ejus; Leontifredus, constabulus ejus; Girinus, capellanus ejus; Petrus, camerarius Balmensis; Milo, magister operis Cluniacensis, prior de Loco Dei; Haymo, prior Sanctæ Mariæ Bisoncii; Lambertus, frater ejus; Johannes de Masiliis; Hugo, prior de Jois; Poncius, elemosinarius Balmensis; Godardus, prior de Ceis; Petrus, miles, dominus de Ceis; Willermus, miles, de Salins; Marnerius, miles, et Johannes, filius ejus.