CCE: cartae cluniacenses electronicae
Database of the Charters of the abbey of Cluny (802-1300)

BB 4165     View  [Back]
Charta qua Samson, Remensis archiepiscopus, notum facit Manassem et alios dedisse ecclesiæ S. Genesii et monachis Cluniacensibus quidquid habebant in molendinis apud Turrim super Maternam.
In nomine sanctæ et individuæ Trinitatis. Ego Sanson, divina miseratione Remorum archiepiscopus, universis sanctæ matris ecclesiæ filiis, tam præsentibus quam futuris in perpetuum. Ne oblivione pereat quod expedit reminisci, litterarum apicibus mandari jussimus, quod Manasses, filius Johannis et Helvidis, uxor ejus, et Adelaidis, quondam uxor Eustachii, cum filiis suis, Hugone scilicet et Eustachio et filia Agne, partem quam in molendinis apud Turrim super Maternam habebant ecclesiæ Sancti Genesii et monachis Cluniacensibus ibidem Deo servientibus, sub annuo censu decem modiorum annonæ et semis, et centum quinquaginta anguillarum sibi et successoribus suis perpetuo tenendam concesserunt, ita quod Manasse tres modios frumenti et quatuor modios avenæ, necnon et Adelaidi et filiis suis duos modios avenæ et modium frumenti et dimidium annuatim persolverent. Statutum etiam et concessum est, ut bannus et justitia et quicquid ad prædictos molendinos pertinet, in manu monachorum sine aliqua contradictione sit. Hoc aliquando Eustachius infringere conatus est, et ecclesiam ex parte vexavit; sed postmodum ad se rediens, injusticiam suam recognovit, et ita immobiliter manere, sicut constitutum esse prædiximus, per manum nostram perpetuo concessit, medietatem partis quæ ad eum pertinet, duorum videlicet modiorum avenæ et modii dimidiique de tritico in festo beati Andreæ, alteram vero medietatem in festo beati Johannis recepturus. Hæc præsentibus litteris mandata ut inconvulsa permaneant, sigilli nostri impressione corroborari fecimus et idoneorum testium nomina subscribi præcepimus. Hugo, abbas Sancti Remigii; Johannes, abbas Sancti Nicolai; Odo, abbas Sancti Dyonisii; Boso, archidiaconus; Drogo, præpositus; Leo, decanus; Gregorius, cantor; Constantinus et Henricus, presbyteri; Rogerus et Guido et Boso, subdiaconi; Stephanus, decanus; Paganus de Fimiis; Dudo, præpositus; Erlaudus et Eurardus, fratres. Actum Remis, anno incarnati Verbi Mo Co LIIo, indictione XIIII, regnante Hludovico, Francorum rege, anno XV, archiepiscopatus autem domni Sansonis anno XIIo. Robertus, cancellarius, recognovit, scripsit et subscripsit.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung