In nomine sancte et individue Trinitatis. Fridericus, divina favente clementia, Romanorum rex augustus. Si religiosorum vota et peticiones clementer admittimus, et ad cultum divine religionis gratiosum favorem eis impendimus, tam temporalis quam eterne beatitudinis premia felici commertio nobis contrahere non ambigimus. Eapropter omnium tam presentium quam futurorum sollers noverit industria, qualiter nos, ob reverentiam et peticionem dilecti nostri Petri, venerabilis Cluniacensis abbatis, statutum donationis quod Cluniacensi ęcclesię de Balmensi cenobio cunctisque possessionibus ad ipsum locum pertinentibus collatum est a reverendo videlicet patre nostro papa Eugenio tercio, necnon ab Humberto, Bisuntinę ecclesię venerabili archiepiscopo, seu a Willelmo, Burgundie preclaro comite, nos quoque, regia auctoritate corroboramus et confirmamus, et pagine presentis privilegio in ęternum valituro, de nostro ac regni dominio in Cluniacensis monasterii et abbatum ipsius dominium transactamus, salvo tamen jure, quo regno eadem Balmensis ęcclesia subjecta esse cognoscitur. Regia nichilominus auctoritate precipimus, ut eadem ęcclesia nullum advocatum habeat, nisi quem Cluniacensis abbas eligere voluerit; et ut omnia firma et inconcussa pace retineat quecumque temporibus Alberici abbatis possedit, vel quę eo tempore possidebat, quo eam Cluniacensis abbas regendam suscepit. Jubemus etiam, ut quicunque ex jure Balmensi abbati olim hominium faciebant, Cluniacensi abbati absque ulla contradictione modo similiter faciant. Ipsam quoque Balmensem ęcclesiam et omnia ad eam pertinentia ob salutem animę nostrę et omnium parentum nostrorum in tuicionem nostram suscipimus, regia auctoritate prohibentes ne aliqua magna seu parva persona ab hominibus ejusdem ęcclesie districtum vel aliquam exactionem exigat, nec Balmenses monachos a perquirendo jure suo in propriis possessionibus impedire presumat. Ex quibus quasdam propriis necessarium duximus exprimendas vocabulis: monasterium videlicet Sancte Marie Grandifontis, cum omnibus appendiciis suis, monasterium Sancti Petri Gaude, cum omnibus appenditiis suis, monasterium Sancte Marie infra urbem Bisuntinam, quod vocatur Jussanum, cum omnibus appendiciis suis, monasterium Sancti Eugendi Ęthice, monasterium Sancti Lauteni, monasterium Sancti Desiderati Ledonensis cum omnibus appendiciis ipsorum; Mulnet, Crancet, Noviacum, Biviliacum, Sabonarie, Alafrautam, Sanctus Mauricius, Sanctus Renebertus, monasterium Sancti Stephani de Ponte, monasterium Sancte Angnetis, Sisinciacum, Capellam, Beneventum, monasterium Sciense, monasterium de Dola, monasterium Strabonense. Que omnia cum reliquis acquisitis vel acquirendis, Balmensi ęcclesię et per eam Cluniacensi regia auctoritate confirmamus et in perpetuo possidenda contradimus. Adicientes ut nullus hujus nostrę traditionis statutum infringere presumat. Si quis autem in aliquo temere contraire temptaverit, regio banno subjaceat et mille libras auri camerę nostrę persolvat. Et ut hęc omnia ęternaliter rata et inconvulsa permaneant, presentem paginam sigilli nostri impressione insigniri jussimus. Testes interfuerunt, quorum nomina subscripta cernuntur: Arnoldus, Coloniensis archiepiscopus; Gunterus, Spirensis episcopus; Conradus, Wormaciensis episcopus; Anselmus, Havelbergensis episcopus; Conradus, Augustensis episcopus; Wibaldus, Corbiensis atque Stabulensis abbas; Henricus, dux Saxonie; Henricus, dux Bavarie; Bertoldus, dux Karinthie; Teodus, comes Hollandie; Heremannus, palatinus comes; Hugo, comes de Tagesburch. Signum donni Friderici Romanorum (Monogramme) regis invicti. Ego Arnoldus cancellarius recognovi. Datum Wormatie, anno Dominice incarnationis M^o C^o L^o III^o, indictione I, III^o idus junii, regnante domino Friderico Romanorum rege glorioso, anno vero regni ejus II^o, in Christo feliciter. Amen. (Image du monogramme)