Hu. Ostiensis, B. Portuensis episcopi, W. tituli Sancti Petri ad vincula presbyter, M. Sancti Georgii ad velum aureum, Dei gratia Romanæ ecclesiæ cardinales, venerabilibus fratribus J[ohanni] eadem gratia Magalonensi episcopo ejusdemque loci capitulo, Stephano, Cluniacensi abbati, universoque ejusdem loci conventui, salutem in Christo. Dum in concilio Turonis celebrato, ad terminandam controversiam quæ super ecclesia Beati Petri juxta Montempessulanum sita inter vos vertebatur, a serenissimo papa Alexandro dies vobis fuisset apostolicis litteris præstituta, et Romanorum pontificum scriptis in medium hinc inde prolatis, lis ipsa dubios sortiretur eventus, ex mandato præfati Romani pontificis, partis etiam utriusque consensu, hujusmodi perpetuis temporibus inter vos statuimus servari concordiam. Ut scilicet de cetero monachi Cluniacenses excommunicatos Magalonensis ecclesiæ, seu etiam interdictos non recipiant neque pœnitentiam dent in villa Montispessulani vel in aliis villis Magalonensis episcopatus per se aut per capellanum aliquem introductum. Ad infirmos etiam non accedant nisi vocati, neque sacerdotalem miserationem aliquando exhibeant. Cum autem vocati accesserint, si infirmus apud eorum monasterium sepulturam elegerit, liberam ejus habeant sepulturam. Canonici vero Magalonenses in pulsandis campanis et receptione funeris in ecclesia debitam humanitatem exhibeant. Monachi autem tertiam partem omnium quæ eis infirmus moriens contulerit, canonicis Magalonensibus solvant, nisi forte decedens præfatis monachis in conversum vel monachum se reddiderit, vel etiam talis fuerit in quem jus excommunicationis ferendæ Magalonenses, cum decederet, non haberent. Si autem is qui apud jam dictum monasterium sepeliri decreverit, partem rerum suarum monachis partemque prænominatis canonicis duxerit relinquendam, canonicis dabitur optio de duobus, ut scilicet a monachis nihil recepturi legatam sibi partem retineant, aut relictorum contributione facta, totius summæ partem tertiam assequantur. Præterea missas sponsaliorum seu partus canonici Magalonenses non decantabunt, neque jam dictos parrochianos recipient in præcipuis festivitatibus vel ad pœnitentiam, si ecclesiis ad quas spectant voluerint se forte subtrahere. Decimas quoque ad jus Magalonensis ecclesiæ spectantes de cetero non recipient nec retinebunt. Sed tam de hiis prediis, quæ nunc in prænominata parrochia habent, quam de hiis, quæ in futurum ad proprietatem eorum fuerint modis aliquibus devoluta, decimas Magalonensi ecclesiæ persolvant, exceptis terris et vineis quas nunc, tempore scilicet hujus concordiæ introductæ, circa idem monasterium sine interpositione fluminis aliarumve terrarum possidere noscuntur. Si vero aliquando contigerit villam circa monasterium prænominatum ædificari, jus parrochiale in eadem villa Magalonensis ecclesia obtinebit. Monachorum autem erit capellanum eligere ejusdemque loci episcopo præsentare. Præsentatus autem ab episcopo curam animarum recipiet, nisi causa evidens et rationabilis contradicat. Nihilominus etiam statuimus, ne aliquando liceat Cluniacensibus duodenarium monachorum numerum in eodem prioratu excedere aut aliquando ibi constituere abbatem, seu aliam ecclesiam in sæpedicto episcopatu absque episcopi et capituli consensu ædificare. Non licebit etiam monachis possessiones ad Magalonensem ecclesiam ratione feodi vel alio jure pertinentes, aut canonicos vel conversos ipsius, seu etiam donatos, absque episcopi et capituli licentia recipere. Idem etiam tenebuntur canonici erga monachos observare. Consecrationes quoque ecclesiarum et altarium atque promotiones monachorum ad Magalonensem episcopum pertinebunt, si ea gratis et libere peragere voluerit. Ut autem hujusmodi concordia perpetua stabilitate firmetur, sigillorum nostrorum munimine eam duximus roborandam. Actum Turonis, idus junii, anno incarnationis Dominicæ M. C. LXIII, indictione undecima, pontificatus magnifici papæ Alexandri tertii anno quarto.