CCE: cartae cluniacenses electronicae
Database of the Charters of the abbey of Cluny (802-1300)

BB 4218     View  [Back]
Charta qua Johannes, prior Vergiaci, monachis Cistercii tradit quidquid ecclesia Vergiacensis habebat in loco qui Distannum dicitur.
Noverint omnes ecclesie filii, tam presentes quam futuri, quod Johannes, prior Vergiaci, voluntate et assensu tocius capituli sui, quicquid ecclesia Vergiacensis habebat in loco qui Dystannum dicitur, tam in terris cultis quam incultis, nemoribus, pratis et aquis, decimis, et in omnibus que ibi possederant, monachis Cistercii in perpetuum possidendum tradiderunt, eo scilicet tenore, ut monachi Cistercienses monachis Vergiaci annuatim quadraginta sextarios annone reddant ad mensuram Divionis, que tunc temporis erat, medietatem frumenti et medietatem ordei, talis quale[m] terra ipsa portaverit. Et sciendum quod idem census infra quindecim dies post octabas Pasche reddetur. Sed si monachi Vergiaci eum non requisierint aut accipere noluerint, monachi Cistercii immunes erunt a culpa. Verum hoc monachi Vergiacenses sibi retinuerunt, ut in nemoribus Destanni ligna acciperent ad vasa sua et proprias domos Vergiaci edifficandas, tam ipsi quam famuli eorum, illi dumtaxat qui cothidianas prebendas in domo eorum accipiunt. Hoc pactum laudaverunt et priorem Cistercii investierunt monachi et famuli Vergiacenses, quorum hic nomina continentur: Johannes, ipse prior Vergiaci, Bernardus prior claustralis, Bernardus decanus, Guido de Valle, Agano, Petrus de Marriniaco, Rodulfus, Sichardus, Richardus, Achardus Rannulphus, Guido, monachi famuli; Nicholaus major, Heinricus, Henricus major, Petrus Signarius famulus, Arnulfus cocus. Iterum Cistercienses et Vergiacenses monachi inter se statuerunt, ne a quolibet priore Vergiacensi monachi Cistercienses prefatum censum in vadimonium vel aliquam commutationem acceperent, absque consensu totius Vergiacensis capituli; ut autem Cistercienses habere possent predictum territorium de Destanno, monachis Vergiacensibus dederunt octoginta libras et centum agnos in principio et in introitu rei. Ex his vero famuli habuerunt partes suas. Dederunt Cisterciences etiam XXV solidos ad procurationem unius prandii Vergiacensium, et pro uno quoque monachorum Vergiacensium, cohabitantium ibi et morientium, Cistercienses in morte facere promiserunt sicut pro suis. Et Vergiacenses similiter pro Cisterciensibus se promiserunt acturos. Promiserunt etiam Vergiacenses Cisterciensibus de hoc territorio Destanni, de eo scilicet quod ad jus suum pertinebat, legitimam garantiam portare. Et ut ea que prediximus firma et illibata permaneant, in presentia domini Henrici, tunc temporis Eduensis episcopi, recitata et confirmata sunt, et, rogatu utriusque partis, sigillo ipsius roborata; et nomina testium qui ibi affuerunt, videlicet apud Sedelocum, inferius sunt notata: Seguinus, Eduensis decanus; Raninardus (sic) de Glene, Osbertus de Tilio, Jacobus et Rainerius de Voidenai, nepotes ejus; Gauffredus, prepositus Sedeloci; Seguinus, major Sedeloci; Canino de Monte Regali, Humbertus, monachus de Channe, et Rainnerius, monachus Clarevallis. Hoc idem pactum postea recitatum et confirmatum est in presentia Hugonis, ducis Burgundie, et, rogatu utriusque partis, sigillo ipsius roboratum. Nomina vero testium, qui ibi affuerunt hec sunt: Galterius, Lingonensis episcopus; Guido, decanus de Funge, Johannes de Belna, decanus Divionis; Josbertus de Grance; Haimo Rufus; Guerricus, miles Vergiacensis. Facta sunt autem hec anno ab incarnatione Domini millesimo centesimo sexagesimo quarto, Ludovico rege Francorum regnante, Henrico Eduensium episcopo, Hugone duce Burgundie, nepote ipsius; Gilberto abbate Cistercii existente.
(Au dos:) Pactum pacis cum monachis Vergiaci super territorio de Destain.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung