Litteræ Raimundi, Arelatensis archiepiscopi, ad Rodulfum abbatem Cluniacensem, de abbatia Sancti Gervasii.
R[odulfo], venerabili Cluniacensi abbati, et sacro conventui ejusdem loci, R[aimundus], Arelatensis dictus archiepiscopus, cum prosperitate salutem. Noverit vestræ fraternitatis discretio, quod intuitu religionis monasterii vestri et honestatis quæ, Deo volente et beato Petro apostolo cooperante, longe lateque resplendet, monasterium et vos modis omnibus diligere et jura vestra per diocesim nostram illæsa custodire desideramus. Verum super prudentia et discretione monasterii vestri satis miramur qua tarditate vel negligentia abbatiam Sancti Gervasii, quam ad vos jure pertinere credimus, quærere et recuperare nostris temporibus negligitis, præcipue cum abbas vester Pe[trus] et predecessor noster bonæ memoriæ super hoc convenerunt et laudatione et confirmatione ab Arelatensi ecclesia eidem abbati et monasterio facta, instrumentum conventionis per alphabetum divisum inter se fecerunt, et sic monachi vestri ejusdem monasterii possessionem nacti, guerra interveniente, tempore procedente ejecti fuerunt. Ideoque, quia facultatem loquendi et tractandi vobiscum super his non habemus, priorem de Podioleno vel de Ponte, cum quibus locuti sumus, ad vos transmittimus, ut de his quæ ex parte nostra vobis dixe
rint eis credatis, et de voluntate et consilio vestro nobis rescribatis. Valete, et nostri memores in orationibus vestris amore Dei, si placet, estote.