Ar[ducius], Dei gratia Gerbensis episcopus, cunctis in Christo fidelibus, tam præsentibus quam futuris, æternam in Domino salutem. Tranquillitati et libertati ecclesiarum ac Deo jugiter famulantium ex officio nobis injuncto et ex debito caritatis, quæ in suo fonte non admittit alienos, invigilare debemus ut in beneplacito creatoris vel ad modicum respiret sancta Dei ecclesia, quæ a principibus hujus seculi frequenter gemit inter malleum et incudem. Hinc est quod ecclesia de Condaminio post persecutiones et naufragia portum suæ liberationis adinvenit. Henricus, dominus de Fociniaco, nepos noster, apud Salanchiam, convocatis majoribus terræ suæ, quicquid juris in ecclesia de Condaminio haberet, in nostra præsentia et R. Teutonici et Raimondi, fratrum nostrorum, Willermi et Aimonis, nepotum nostrorum, recordari fecit post fidelitatis examen et juramenti interpositionem a dapiferis et ministris et ab eis, ad quos tum ex ævi longinquitate, partim ex ipsis rebus constabat, notitialis facta est recordatio. Si contingeret terram de Fulciniaco impugnari ab hostibus, in tutamentum terræ esse deberent homines ecclesiæ de Condaminio; si fera in terra de Condaminio caperetur, ipsius venationis dimidium ad dominum de Fuciniaco portaretur; justitia adulterii, homicidiorum furtique banna ad dominum de Fuciniaco pertinent. In aliis omnibus libera est ecclesia supradicta ab omni exactione et gravamine, nisi esset ejus spontanea voluntas. Hoc in manu nostra firmiter stabilitum est et laudatum a domino Henrico de Fuciniaco et a fratribus suis Guillermo et Haimone et Marchesio; ita tamen quod si quæstio inde oriretur vel querimonia ex parte ecclesiæ de Condaminio, quod gravaretur vel molestaretur in aliquo, districta a nobis et a nostris successoribus pro illo excessu fieret justitia, ne temeritas remaneret impunita. Hanc presentis paginæ subscriptionem sigillo nostro firmamus et munimus, ut nullam habeat repulsam quod justitia stabilivit. Actum est hoc domino Alexandro sanctæ Romanæ ecclesiæ præsidente, Frederico imperatore, Amedeo, comite Gebennensi, tempore prioris Guillermi, qui multum pro hac pace et pro libertate ecclesiæ laboravit, anno ab incarnatione Domini nostri Jesu Christi M. C. LXX octavo, die Veneris, mense junio. Ego Girbertus, Gerbensis canonicus et magister, scripsi et feci hanc cartam jussu domini Alexandri, Girbernensis episcopi, habentis vices cancellarii. Pro testibus affuerunt Nantelmus decanus, Fredoardus, Willermus, Jospez, Gebernenses canonici; Albertus et Guillermus, monachi; Lambertus, sacerdos; Rodulfus Teutonicus et Raimundus de Fociniaco, fratres episcopi; Poncius Pilatus, Guido [de] Fraxino, Guillermus Seginus, Aimo de Sinaco, Guillermus de Fraxia, miles; Alimarus de Castellione, Turombertus, filius ejus; Manerius de Chalanchia, Anselmus de Rancurel, Petrus Festa, Petrus Giroldus, dominus Giroldus de Margancello, bajulus negotii, et alii. Hoc in fine apponimus scripti hujus, ut omnis occasio et calumnia amoveatur, ne homines de Condaminio graventur in objectis, nisi prius convicti vel confessi essent, ne justus et innocens a justo reprimatur.