CCE: cartae cluniacenses electronicae
Database of the Charters of the abbey of Cluny (802-1300)

BB 4268     View  [Back]
Privilegium Alexandri papæ III, quo confirmat omnes possessiones monasterii Novi Pictavensis.
Alexander, episcopus, servus servorum Dei, dilectis filiis Helie abbati Novi Monasterii, ejusque fratribus, tam presentibus quam futuris, regularem vitam professis in perpetuum. Ad hoc universalis ecclesie cura a provisore omnium bonorum Deo nobis commissa est, ut religiosas diligamus personas et beneplacentem Deo religionem studeamus modis omnibus propagare. Nec enim Deo gratus aliquando famulatus impenditur, nisi ex caritatis radice procedens, a puritate religionis fuerit conservatus. Oportet igitur omnes christiane fidei amatores religionem diligere et loca venerabilia cum ipsius personis divino servitio mancipatis attentius confovere, ut nullis pravorum hominum inquietentur molestiis vel importunis angariis fatigentur. Eapropter, dilecti in Domino filii, vestris justis postulationibus clementer annuimus et monasterium vestrum in quo divino mancipati estis obsequio, sub beati Petri et nostra protectione suscipimus et presentis scripti privilegio communimus, statuentes ut quascumque possessiones, quecumque bona Willelmus, bone memorie quondam Pictavensis comes, seu fideles alii de suo jure eidem monasterio contulerunt et inpresentiarum idem monasterium juste possidet, sive in futurum rationabiliter poterit adipisci, firma vobis vestrisque successoribus et illibata permaneant. In quibus hec propriis duximus exprimenda vocabulis: locum ipsum, in quo prescriptum monasterium constructum est, cum omnibus pertinentiis suis, ecclesiam Sancti Germani cum capella leprosorum; ecclesiam Sancti Eparci, ecclesiam de Pectinaria, ecclesiam Sancti Pauli, ecclesiam Sancti Nicholai, ecclesiam de Capella [de] Moleriis, ecclesiam de Capella Mosterioli, ecclesiam de Chiric, ecclesiam de Lerpnia, ecclesias de Magnic, ecclesiam de Podio, ecclesiam de Amberia, ecclesiam de Benniaco, ecclesiam de Castello Berusii, ecclesiam de Marnic, ecclesiam de Faia, ecclesiam de Cormerio, ecclesiam Sancti Saturnini, ecclesiam de Boeth, ecclesiam de Andilliaco, ecclesiam Sancti Vincentii, capellam Sepulchri, ecclesiam de Sartis, ecclesiam de Banzac, ecclesiam de Vinast, ecclesiam de Albiniaco, ecclesiam de Ruella, capellam de Sart, cum omnibus earum pertinentiis. In parrochialibus vero ecclesiis quas tenetis, liceat vobis clericos eligere et episcopo presentare, quibus, si idonei fuerint, episcopus animarum curam committat, ita quidem quod ei de spiritualibus, vobis vero de temporalibus debeant respondere. Liceat quoque vobis clericos et laicos e seculo fugientes liberos et absolutos ad conversionem recipere et eos, absque ullius contradictione, in vestro collegio retinere. Prohibemus insuper ut nulli fratrum vestrorum, post factam in eodem loco professionem, fas sit de claustro vestro, sine abbatis sui licentia, nisi obtentu arctioris religionis discedere; discedentem vero sine communium litterarum vestrarum cautione, nullus audeat retinere. Cum autem generale interdictum terre fuerit, liceat vobis, clausis januis, non pulsatis campanis, expulsis excommunicatis et interdictis, suppressa voce, divina officia celebrare. Sepulturam quoque ipsius loci liberam esse decernimus, ut eorum devotioni et extreme voluntati qui se illic sepeliri deliberaverint, nisi forte excommunicati vel interdicti sint, nullus obstat, salva tamen justicia illarum ecclesiarum [a] quibus mortuorum corpora assumuntur. Obeunte vero te, nunc ejusdem loci abbate, vel tuorum quolibet successorum, nullus ibi qualibet surreptionis astutia, seu violentia preponatur, nisi quem fratres communi consensu vel fratrum pars consilii sanioris, cum assensu Cluniacensis abbatis, secundum Dei timorem et Beati Benedicti regulam providerint eligendum. Electus autem a Pictavensi episcopo benedicatur, omni professionis exactione reposita. Preterea consecrationes altarium seu basilicarum, ordinationes monachorum vel clericorum, qui ad sacros ordines fuerint promovendi, ab eodem episcopo recipiatis, si quidem catholicus fuerit, et gratiam atque communionem apostolice sedis habuerit, et ea gratis et absque pravitate aliqua voluerit exhibere: alioquin liceat vobis catholicum quem malueritis adire antistitem, qui nimirum nostra fultus auctoritate, quod postulatur indulgeat. Presenti quoque capitulo duximus adjungendum, ut nec eidem episcopo, nec episcopi ministro cuiquam liceat citra nostram vel legati nostri a latere nostro missi licenciam, in locum vestrum temere excommunicationis vel interdicti proferre sententiam, sed nec alicui seculari potestati fas sit idem monasterium indebitis oppressionibus vel serviciis aggravare, quatinus ab omni servitii sint infestatione securi, omnique gravamine mundane oppressionis remoti et in sanctæ religionis observatione seduli quietique persistatis, nec ulli alii, nisi abbati Cluniacensi, aliqua teneamini occasione subjecti. Nemini quoque liceat sine vestro et diocesani episcopi assensu ecclesiam vel oratorium infra parrochiam Novi Monasterii edificare, salvis privilegiis Romanorum pontificum. Decernimus ergo, etc., salva apostolice sedis aucthoritate et in predictis ecclesiis diocesanorum suorum canonica justicia. Si qua igitur, etc ... Ego Alexander, catholice ecclesie episcopus, subscripsi. Ego Hubaldus, Hostiensis episcopus, subscripsi. Ego Theodinus, Portuensis et Sancte Rufine episcopus, subscripsi. Ego Petrus, Tusculanus episcopus, subscripsi. Ego Henricus, Albanensis episcopus, subscripsi. Ego Bernardus, Prenestinus episcopus, subscripsi. Ego Johannes, presbiter cardinalis Sanctorum Johannis et Pauli, tit. Pamachii, subscripsi. Ego Johannes, presbiter cardinalis tit. Sancte Anastasie, subscripsi. Ego Johannes, presbiter cardinalis tit. Sancti Marci, subscripsi. Ego Petrus, presbiter cardinalis tit. Sancte Susanne, subscripsi. Ego Vivianus, presbiter cardinalis tit. Sancti Stephani in Celio Monte, subscripsi. Ego Cincthius, presbiter cardinalis tit. Sancte Cecilie, subscripsi. Ego Hugo, cardinalis tit. Sancti Clementis, subscripsi. Ego Arduinus, presbiter cardinalis tit. Sancte Crucis in Jerusalem, subscripsi. Ego Jacobus, diaconus cardinalis Sancte Marie in Cosmedin, subscripsi. Ego Ardicio, diaconus cardinalis Sancti Theodori, subscripsi. Ego Rainerius, diaconus cardinalis Sancti Georgii ad Velum Aureum, subscripsi. Ego Gratianus, diaconus cardinalis Sanctorum Cosme et Damiani, subscripsi. Ego Rainerius, diaconus cardinalis Sancti Adriani, subscripsi. Ego Matheus, Sancte Marie Nove diaconus cardinalis, subscripsi. Ego Bernardus, diaconus cardinalis Sancti Nicholai in Carcere Tulliano, subscripsi. Datum Laterani, per manum Alberici, sancte Romane ecclesie presbiteri cardinalis et cancellarii, VIII kal. junii, indictione XII, incarnationis Dominice anno Mo Co LXXVIII, pontificatus vero Alexandri pape III anno XXo.
(Au dos:) Privilegium Alexandri de Novo Monasterio.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung