Charta qua Willelmus, Remorum archiepiscopus, confirmat Cluniacensi abbati præsentationem presbyteri in ecclesia de Turre super Maternam.
Guillermus, Dei gratia Remorum archiepiscopus, sanctæ Romanæ ecclesiæ tituli Sanctæ Sabinæ cardinalis, apostolicæ sedis legatus, omnibus ad quos litteræ istæ pervenerint, in Domino salutem. Noverit universitas vestra, quod cum inter dilectum nostrum T[heobaldum], abbatem Cluniacensem, et Hilduinum, Remensem archidiaconum, super præsentatione presbiteri in ecclesia de Turre super Maternam, quæstio verteretur, tandem partibus in presentia nostra constitutis, prædecessorum nostrorum bonæ memoriæ Rainaldi et Manasse quondam Remensium archiepiscoporum privilegia diligenter inspeximus; ex quibus cum nobis innotuisset jus altaris et repræsentationem presbiteri ad Cluniacensem ecclesiam pertinere, id ipsum juris juxta eorundem privilegiorum formam eidem ecclesiæ adjudicavimus: factaque a jam dicto archidiacono ejusdem juris renuntiatione, eum quem ipse, ad præsentationem jam dicti abbatis, nobis præsentavit, ad illius ecclesiæ recepimus administrationem. Data per manum Alexandri, cancellarii nostri, anno ab incarnatione Domini Mo Co LXXo IXo, mense februario.