Urbanus, etc. ... Hugoni abbati et conventui Clun. etc. ... Quanto specialius cenobium vestrum, etc. ... existere promptiores. Pervenit autem ad nos quod, cum nobilis vir P[etrus], Nivernensis comes, monasterio vestro Sancti Stephani Nivernensis multa dampna et injurias intulisset, tandem, litterarum nostrarum auctoritate commonitus, a suo facto resipuit, et libertatem burgi predicti Sancti Stephani Nivernensis, prout debuit, recognovit, et eam se promisit, juramento prestito, servaturum; compositionem quoque ab eodem comite et Agnete, uxore ejus, cum fratribus vestris predicti Sancti Stephani amicabiliter factam ad memoriam futurorum scriptis autenticis roborarunt, quam karissimus in Christo filius noster Philippus, illustris Francorum rex, ratam habuit, et nichilominus sui scripti munimine confirmavit. Nos itaque, vestris postulationibus annuentes, compositionem illam, sicut inter prefatos fratres vestros et jam dictum comitem et uxorem ejus, de assensu partium facta est, et non solum eorum, sed etiam ipsius regis scriptis autenticis roborata, ratam habemus, eamque futuris temporibus manere decernimus illibatam. Ad hec compositionem inter Artaldum Album, dominum Castri Novi, et fratres vestros de Amberta super multis dampnis et gravaminibus, que eis irrogaverat, initam, sicut de assensu partium facta est, et in predicti viri autentico continetur, ne processu temporis rescindatur, ad peticionem vestram similiter ratam habemus, eamque auctoritate nostra et presentis scripti patrocinio communimus. Statuentes, etc. Si quis, etc. Datum Verone, X kal. septembris.