Quoniam propter vitæ præsentis brevitatem et succedentium varietatem, facile labitur a memoria quod a mortalibus geritur, nisi litteris fuerit annotatum, eapropter, in Dei nomine, ego Hugo, dux Burgundiæ, notum facio presentibus et futuris, quod pro salute mea et meorum, et pro animabus parentum et antecessorum meorum et pro anima domini Guirardi de Reon, in emendationem damnorum, quæ intulit ecclesiæ Cluniacensi, dedi et hac mea carta confirmavi Deo et beatis apostolis Petro et Paulo, et ecclesiæ Cluniacensi, consensu et voluntate filiorum meorum, Odonis et Alexandri, totam partem meam in venditionibus de Castellione, integre et plenarie, cum omnibus pertinenciis suis, absque ulla exceptione, sicut dominus Lingonensis episcopus alteram partem unquam plenius vel liberius habuit, cum libertatibus et consuetudinibus suis, sive venditiones infra burgum, sive extra fiant. Et hoc donum garantizabimus memoratæ ecclesiæ Cluniacensi, ego et heredes mei. Porro domnus abbas H[ugo] et conventus concesserunt mihi missam unam cotidianam et continuam pro anima domini Girardi de Rion, præter anniversarium ejus, ideo quod medietatem suprascripti redditus pro eo dedi et alteram medietatem pro me ipso. Testes sunt: Artaudus, sacrista Cluniacensis, quem de memorata donatione præsentem investivi, Petrus de Pousiol, Berardus de Bosco, Robertus Billo, monachi; et de laicis: Simon de Brecon, Girardus, præpositus de Castellione, Petrus major, Radulfus, aurifaber, et alii multi. Actum anno ab incarnatione Domini M. C. LXXXVII.