Quoniam humana natura labilis est, et res gestæ facile traduntur oblivioni, nisi fuerint scripti veritate firmatæ, idcirco decrevit sollertia prudentum, ut donationes et pacta sive contractus ad malum oblivionis fugiendum litterarum fidei commendentur. Inde est, quod ego Hugo, dominus Vergiaci, notum facio præsentibus et futuris, quod, ob remedium animæ meæ parentumque meorum, et propter gravamen quod homines mei fecerunt in villa de Givriaco, quam occasione guerræ ducis combuxerunt, dono Deo et beatis apostolis Petro et Paulo Cluniacensi ecclesiæ homines, quos in eadem villa meos dicebam esse servos, verum esset aut non, quicquid juris in eum habebam, et ut occasio malignandi a me et a meis tolleretur. Concedo scilicet filios et filias Ricardi, decani et Balduini, et quicquid ex eis processerit. Sic cepi ac cepi librum, et obtuli eos per librum prædictis apostolis Petro et Paulo super altare beati Dionysii, et prior ejusdem domus et Belnæ, nomine Guillermus, accepit eos per librum. Deinde accepi Theobaldum Dimidium, decanum, per manum, et fratres ejus Hugonem et Andream pro aliis omnibus, et de manu mea misi in manum prioris prædicti, per quem totum hoc factum fuit, ut quite, libere ac perenniter jure hereditario possideret et haberet ecclesia; fecique eos jurare super altare et reliquias beati Dionysii et sancti Vincentii fidelitatem ecclesiæ et ne alium dominum facerent vel nominare præsumerent contra ecclesiam, seque et suos omnes servos esse ecclesiæ nunquam negarent. Si sacramentum (quod absit!) non tenerent, forefactores corporum et pecuniarum essent ecclesiæ, et quicquid de ea tenerent perderent. Et ego Hugo super prædictas reliquias et altare, ne aliquid ultra requirerem in eis bona fide, bona intentione promisi, juravi, et si aliquis eorum contra sacramentum se alienare ab ecclesia vellet, pro posse meo adjuvarem dictam ecclesiam ut recuperare posset. Facta est carta anno ab incarnatione Domini M. C. LXXX. septimo, regnante Philippo rege Franciæ, Hugone duce Burgundiæ, T. Æduensi episcopo. Et ut carta hæc firma et rata sit omni tempore, feci eam muniri sigillo capituli Sancti Dionysii et sigillo meo. Testes hujus rei sunt: dominus Hugo et uxor ejus, domina Gilia, et Symon frater ejus, Petrus de Nui, canonicus, Petrus de Isuirez, Hugo Robertus miles, et Aimo Turgifer, Bernardus de Beona, et Roba, Robertus et frater ejus, Petrus Bonomet, Guillermus prior, Ancelmus et Leibaudus monachi, Benignus sutor, Guirardus filius Andreæ, Lunarisse et filius ejus Robertus, Bertot Magnus, Jacelmus filius Roberti, Morellus, Galterus Trucaut, Guibergus. Ego Æduensis episcopus Stephanus hanc donationem vel guerpitionem, quam venerabilis Hugo Cluniacensi ecclesiæ amore Dei fecit, confirmo sigilloque meo munio. Et quicumque contra hoc factum ire præsumpserit, anathema sit.