Post quinque vero dies convenerunt idem priores ante eandem reginam, presentibus compluribus bonis hominibus, et predicti sex inquisitores veritatem quam diligenter inquisierant et in scripto redegerant ibi publicaverunt: ubi manifeste comparuit, quod prescriptus prior Montis Zeberrii monasterium Sancte Marie de Villa Franca injuste vexaverat, quia in ipsa parrochia de Villa Franca, que tota, cum omnibus terminis suis, ab exordio sue fondationis, ad ipsum monasterium Sancte Marie pertinere dinoscitur, in quadam domo sua, ubi modicum altare aliquando habuerat, altare magnum et sollempne construxerat, campanile cum campanis magnis injuriose erexerat, et ad recipiendos parrochianos magnam portam ubi olim murus esse solebat apperuerat, ac parrochiam et jus Sancte Marie sibi usurpaverat, atque subtracto jure parrochie, quod antiquitus capellani Sancte Marie in ipsa domo Zeberrii habere consueverant, decimas et oblationes, sepulturas et cetera jura parrochialia in terminio de Perrex monasterio Sancte Marie abstulerat et sibi occupaverat. Prior autem Montis Zebruarii, licet in hac veritatis inquisitione plurimum gravaretur, tamen tandiu assensit, et se restiturum ablata ac demoliturum nova opera repromisit. Ego regina domina Urracha hec omnia, que coram me gesta fuerunt, scribi feci et confirmo, et ut hoc scriptum robur obtineat perpetuum, sigillum meum appono. Ego P. de Fonte in his omnibus presens fui et confirmo. Ego Dominicus Johannis in his omnibus presens fui et confirmo. Ego Pelagius Barraga[n]s in his omnibus presens fui et confirmo. Ego Martinus Pelagii in his omnibus presens fui et confirmo. Ego Helias Archimbaldus in his omnibus presens fui et confirmo. Ego Ferrandus Gostetz in his omnibus presens fui et confirmo. Ego Ferrandus Arie vidi et audivi et confirmavi. Ego P. Martini confirmavi. Ego Ferrandus presbiter, capellanus regine, confirmavi. Ego Martinus, Astoricensis canonicus, regine clericus, confirmavi. Ego Godinus, diaconus regine, confirmavi. Ego Dominicus Johannis, presbiter, de mandato regine, scripsi et confirmavi.