Sciant qui has litteras viderint, quod ego Oddo, filius ducis Burgundiæ, concedo, laudo et ratam habeo elemosinam quam dominus pater meus dux fecit ecclesiæ Cluniacensi apud Bernam pro excessibus suis. Similiter etiam concedo et ratam habeo elemosinam quam fecit eidem ecclesiæ Cluniacensi apud Castellionem pro salute animæ suæ et suorum, necnon et pro anima Girardi de Reun, fidelis sui. Et hæc præsentis cartæ meæ testimonio confirmavi, ne ullatenus possint in posterum infirmari.