Celestinus, episcopus, servus servorum Dei, dilectis filiis abbati et fratribus Cluniacensibus, salutem et apostolicam benedictionem. Licet universa loca religiosa fovere ac diligere teneamur, illis tamen propensiori cura intendere nos oportet, que sub beati Petri jure consistunt et nullo mediante ad provisionem nostram pertinent et tutelam. Inde est, quod nos monasterium vestrum contra molestationes indebitas speciali volentes libertatis privilegio communire, presentium auctoritate statuimus vobisque benignius indulgemus, ut universos malefactores vestros et hominum vestrorum, qui de provincia fuerint Lugdunensi, si eorum episcopi et ecclesiarum prelati a vobis tertio requisiti eos ad satisfactionem vobis congruam exhibendam non duxerint compellendos, licitum vobis sit vestrisque successoribus illos, candelis accensis, auctoritate apostolica, excommunicationis sententie atque interdicti subicere, quos tandiu nuntietis excommunicationis et interdicti vinculo innodatos, donec de perpetratis excessibus satisfecerint competenter, et, si delicti qualitas hoc exegerit, ad apostolicam sedem cum litterarum vestrarum testimonio venerint absolvendi. Libertates preterea et immunitates ac rationabiles consuetudines monasterii vestri hactenus observatas, ratas esse decernimus, et eas auctoritate apostolica vobis, vestrisque successoribus confirmamus, arcius inhibentes ne quis possessiones, jura vel bona ejusdem monasterii, preter sedis apostolice conscientiam, cui specialiter est subjectum, quomodolibet alienare vel antiquas et rationabiles ipsius monasterii consuetudines, et hactenus observatas violare presumat. Quod si a quoquam fuerit attemptatum, statuimus omnimodis irritandum. Nulli ergo omnino hominum liceat hanc paginam, etc. Si quis autem hoc attemptare presumpserit, etc. Datum Rome, apud Sanctum Petrum, VI idus februarii, pontificatus nostri anno primo.