Gloriam hominis, ut supra. Ego Petrus, comes Nivernensis, dominus Curtiniaci, notum fieri volo universis tam presentibus quam futuris, ad quorum notitiam presentes litteræ pervenerint, quod pro remedio animarum carissimi patris mei et matris meæ et meæ, universos homines ecclesiæ Beati Petri de Curtiniaco in potestate Curtiniaci et Chantecoc et Pifontis constitutos, ab omni corveia et chareia hos quitavi, et immunes in perpetuum esse concessi; presertim divinæ pietatis intuitu ecclesiæ et monachis ibi Deo servientibus concessi, quod quotiens prepositos meos Curtiniaci et Chantecoc et Pifontis a me mutari contigerit, sive a successoribus meis, subsequentes prepositi et servientes alii, priori ecclesiæ Beati Petri Curtiniacensis jurabunt quod homines jam dictæ ecclesiæ, propter occasionem injustam, in causam trahere sive vexare non presument, nec in res ad dictam ecclesiam spectantes absque juris prohibitione violentam manum dehinceps non apponent, et omnia supradicta firmiter observabunt. Si vero supradicti præpositi aut servientes de hominibus ejusdem ecclesiæ jus habere voluerint, dictus prior vel mandatum ejus de ipsis hominibus in curia sua jus eidem exibebit. Hoc autem de mandato meo Petrus Pencerius, tunc prepositus Curtiniaci, et Gaufridus, tunc prepositus Pyfontis, dicto priori juraverunt; quod ut ratum in posterum, presentem paginam eidem priori tradidi sigillo meo roboratam. Hoc laudavit Yolandis, comitissa Nivernensis, domina Curtiniaci, uxor mea. Actum Senonis, anno M^o C^o XC^o III^o.