R[ainaldus], Dei gratia primæ Lugdunensis ecclesiæ minister humilis, Stephanus, ejusdem ecclesiæ decanus, et J[ocerannus], dictus abbas Insulæ Barbaræ, carissimis in Christo Rumiliaci, Engiaci, Giniaci, Moies, Taluise, Amaisiaci, Viriaci parvi, Chavornay, Paisins, Romaniaci, Breno, Arberjamento, Corcelles, Chandouro, Chantre, Serreires, Darlo, Doche, Villæ, Biliaci, Chasnas, Chismiaci, Treelay et Tyes, capellanis universis salutem in Domino. Universitati vestræ præsentium auctoritate volumus innotescat, quod cum inter dominum Nant[elmum], Gebennensem episcopum, ex parte una, et Cluniacenses monachos, ex parte alia, de præsentatione et electione capellanorum in ecclesiis quarum curam geritis, olim gravis quæstio emersisset, nunc de mandato summi pontificis causa ipsa experientiæ nostræ commissa, post auditas hinc inde rationes, electionem et præsentationem capellanorum antedictis monachis adjudicavimus et in ecclesiis in quibus nunc vices geritis capellanorum, eligendi et præsentandi plenam eis contulimus potestatem. Ea propter, in Christo carissimi, universitati vestræ auctoritate apostolica, cujus vices gerimus in hac parte, præcipiendo mandamus, quatinus in ecclesiis vestris a Nantuacensi, de Paterniaco, de Sancto Victore et de Condamina monasteriis, præsentationem vestram et electionem et temporalia, quæ in ecclesiis capellaniæ nomine possidetis, humiliter de cetero recognoscatis, et inde tanquam ab eis, a quibus temporalia ipsa percipitis, fideles esse studeatis peromnia et devoti.