Litteræ H., supprioris Sancti Pancracii de Lewes, ad abbatem Cluniacensem, ut de novo priore ei providere velit.
Reverentissimo patri et domino, Dei gratia domino abbati, frater H., supprior, et conventus humilis Sancti Pancratii, salutem et obedientiam debitam et devotam. Ad pedes paternitatis vestræ humiles ac proni provoluti lacrymis obortis exitum patris et prioris nostri H., piæ memoriæ, dolentes referimus, totis viribus ac precibus supplicibus postulantes, quatinus idoneum nobis pastorem providere velitis, utilem in temporalibus, pium et discretum in spiritualibus, utpote qui domum Lewensem, mores et consuetudines patrias melius no
vistis, negotium jam dictum secundum Deum taliter promoventes, si placet, ut ab eodem dignam recipere valeatis remunerationem. Ad hoc autem perficiendum, dilectos fratres nostros, Johannem et Augustinum, vobis duximus dirigendos. Valeat paternitas vestra in Domino.