Noverint tam præsentes quam futuri, quod ego R[ainaldus], Dei gratia primæ Lugdunensis ecclesiæ archiepiscopus, de mandato Guidonis, fratris mei, comitis Forensis, cum haberem comitatum Forensem in manu mea, nomine tutelæ liberorum ipsius, nepotum meorum, assignavi abbati et conventui Cluniacensi, totam decimam de Nerviaco citra aquam et ultra aquam, scilicet majorem et minimam decimam, pro decem libris Lugdunensis monetæ, quas debitales annis singulis de mandato præfati fratris mei eis assignare tenebar, libere et sine aliqua diminutione, jure perpetuo possidendam; ita quod, nec ego nomine archiepiscopi, vel aliquis successorum meorum, sive capitulum Lugdunense, pater meus, sive nepotes mei, vel heredes eorum, aut aliquis alius in prædicta decima aliquid vendicare possimus, sed tota et integra in annona et in nutrimentis animalium, ad faciendum anniversarium sæpedicti fratris mei ecclesiæ Cluniacensi quieta et in pace remaneat. Et sciendum quod ad hanc decimam colligendam nullus minister est per hereditatem vel per aliquam successionem; sed ille colliget eam et feret ad utilitatem ecclesiæ, cui abbas vel nuntius ejus ipsam committere voluerit colligendam et ferendam in ea libertate, in qua tempore fratris mei hoc fieri consuevit. Ego quoque, ad majorem firmitatem, auctoritate archiepiscopi ratum istud habeo, et sigilli mei auctoritate confirmo. Hoc laudaverunt pater meus et nepos meus Guigo, et sorores ejus Guigona et Marquissa, et uxor fratris mei Adaladix, comitissa. Testes sunt Hugo Benedictionis Dei et Eustorchius Mauriciensis abbates, Guillermus, archipresbyter de Nerunde, Durannus de Spodio, et Johannes de Vaura, Johannes Roche, Aimardus de Vernol, Catardus de Suire, et Chatardus de Tierno. Actum anno incarnati Verbi M. CC. III, mense decembri.