Charta Willelmi, comitis Forcalquerii, qua notum facit se dedisse et remisisse Beatæ Mariæ de Ganagobia quidquid perceperat in villa de Podio, etc.
Anno Dominicæ incarnationis M.CC.VI, die XV ante festum sancti Johannis Baptistæ. Notum sit omnibus tam præsentibus quam futuris, quod ego V[uillelmus], Dei gratia comes Forcalqueriensis, in bona mentis valitudine existens, pro redemptione peccatorum meorum et parentum meorum, titulo meræ et irrevocabilis donationis, spontanea bona voluntate, sine aliquo pravo intellectu, dono, remitto et laudo Deo et beatæ Mariæ de Ganegobie, et Villermo Anglico, priori, et fra
tribus ejusdem domus præsentibus et futuris in perpetuum, quicquid juste vel injuste in claustro et in villa de Podio, et in terris, et in possessionibus ejusdem monasterii ego et antecessores mei vel villici mei percipere consueveramus. Præterea bona fide et sine malo intellectu relinquo, et restituo, ac desamparo sine aliquo retenemento quicquid nos et villici nostri percepimus aut percipere consuevimus in villa de Segoncia, de Hericiis, et de Viseriis, et de Peronto, et in omnibus aliis locis ad prædictum monasterium pertinentibus, ubicunque sint per totum comitatum nostrum. Reddo etiam prædicto monasterio et prædictis fratribus quicquid ego vel alius ex dono nostro in prædictis villis et alibi in comitatu nostro tenemus aut tenuimus, in castris scilicet vel fortericiis, villis, domibus, condaminis, vineis, hortis, pratis, nemoribus et defensis, molendinis, pascuis, aquis, aquarum decursibus, vel alio quocunque modo ad dictum monasterium pertinentibus. Propter etiam multa malefacta et detrimenta, quæ domus et ordo Cluniacensis per guerras nostras sustinuerunt, et nos etiam, peccatis nostris exigentibus, in propria persona illicite fecisse confitemur, ne per hæc peccata anima nostra damnetur, et ut Deus misereatur nostri, in restitutionem tanti detrimenti per nos et per nostros prædicto ordini et fratribus illati, donamus, relinquimus et desamparamus in perpetuum Deo et beatæ Mariæ de Podio sæpedicto Ganegobiæ et fratribus ejusdem loci præsentibus et futuris ibidem Deo servientibus, omnia usatica justa vel injusta quæ nos aut prædecessores nostri vel alius per nos in eorum possessionibus et hominibus hactenus percipere solebamus, ita quod amodo usque in sempiternum a nobis et a nostris ab omni exactione et usatico sint liberi et absoluti. Ad majorem hujus desamparationis, libertatis et donationis firmitatem, cautelam, et ut a nullo qui in comitatu Forcalqueriensi mihi successerit, hæc desamparatio, donatio et libertas, vel aliqua sui in parte possit irritari, tibi domino Villermo priori Anglico de Podio, et per te fratribus de Podio præsentibus et futuris bona fide et sine dolo, sicut melius dici vel intelligi potest, sicut supradictum est, cum hoc præsenti instrumento
sigillo nostro plumbeo sigillato dono, laudo et confirmo. Actum fuit hoc in castro sursum Forcalquerii, ante cameram domini comitis. Et testes fuerunt: Is. Forcalqueriensis præpositus, Andigolus capellanus, Bertrandus, sacerdos Segonciæ, Petrus Farulfus, Durandus Batilii, Garcia Dalo, V. de la Crosa, Raimundus Buxonus, Petrus Blanc. Datum per manum Petri, notarii. S[ignum] ipsius Petri.