Reverendis in Christo fratribus et amicis karissimis J., priori claustrali, et ceteris in ordine fratribus sacroque conventui Cluniacensi, frater W., dictus prior, et totus conventus Nantuacensis, debitam obedientiam cum omnimoda reverentia. Noveritis, quod dominus de Vilaribus, super causa quæ vertitur inter nos et ipsum, domum vestram et homines de Nantuaco in tali servitute vult ponere, quod pro illa domus vestra omnino erit destructa. Nos vero contra ipsum judicem in causa ista nec allegatum possemus invenire et concordiæ, quam ipse dominus de Vilaribus per probos et religiosos viros nobis intimavit, nullo modo sine vestro consilio volumus consentire; super qua nisi Dominus manum consilii sui et vos apposueritis, in magna tristitia sumus et angustia. Quapropter communi consilio conventus Nantuacensis dilectum fratrem nostrum Stephanum, latorem præsentium, vobis duximus transmittendum, cujus omnibus verbis quæ vobis ex parte nostra dixerit credatis, sanctitatem vestram humiliter implorantes, quatinus respectu destructionis domus vestræ super concordia, quam lator præsentium vobis plenarie intimabit, quod melius vobis videbitur et utile, vestrum consilium et commodum, si placet vobis, per litteras vestras nobis remandantes.