Litteræ archiepiscopi et decani Lugdunensis, quibus curam committunt abbati Benedictionis Dei audiendi testes super causa pendente inter ecclesiam Cluniacensem et monasterium Menatense.
R[ainaldus], Dei gratia primæ Lugdunensis ecclesiæ minister humilis, et S. decanus, karissimo in Christo abbati de Benedictione Dei, salutem in Domino. Causa quæ inter Cluniacum et Menatense monasterium de vice summi pontificis coram nobis diutius laboravit, post multas dilationes et dies eo usque processit, quod pars utraque in villa de Cuciaco sub vestra præsentia testium illorum productionem faciendam assensit, qui de diversis partibus evocandi sine gravi dispendio ad nostram non possunt præsentiam laborare. Ea propter, vice nobis commissa, discretioni vestræ duximus committendum, quatinus in villa prædicta partibus ad vestram præsentiam constitutis, testes utriusque partis cum diligenti recipiatis examinatione ad diem, quam eis in octavis beati Johannis Baptistæ super principali negotio præfiximus, clausa nobis et consignata universa transmittentes, quæ hinc inde coram vobis fuerint testificata.